ᐱᓂᐊᕐᓂᕋᐅᑎᖓ

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᑐᕌᖓᑎᑕᐅᔪᖅ ᐸᐸᑕᐅᓂᖏᓐᓄᑦ, ᐱᕚᓪᓕᕈᑎᒃᓴᖏᓐᓄᑦ ᐊᒻᒪᓗ ᓴᐳᔾᔭᐅᓯᒪᔾᔪᑎᑦᓴᖏᓐᓄᑦ ᐃᓄᐃᑦ ᐃᓕᖅᑯᓯᕆᖃᑦᑕᖅᓯᒪᔭᖏᓐᓂᒃ ᐊᒻᒪᓗ ᐃᓕᓴᒃᓇᐅᑎᒋᔭᖏᓐᓂᒃ ᓄᓇᕗᒻᒥ ᐃᑦᑕᕐᓂᓴᓕᕆᕕᐅᕙᑦᑐᓂ, ᖃᐅᔨᔾᔪᑕᐅᕙᑦᑐᑦ ᐃᓄᖏᓐᓂᒃ ᓇᒥᒥᐅᑕᐅᓂᕐᒪᖔᑕ ᐊᒻᒪᓗ ᓄᓇᒥᓂ ᐊᑎᑐᖃᖏᓐᓂᒃ ᓄᓇᐃᑦ.

ᓇᐅᑦᓯᑐᖅᑏᑦ ᐱᓂᐊᕐᓂᕋᐅᑎᖏᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓃᓐᖔᖅᑐᑦ (ᐊᖏᕈᑏᑦ), ᐃᓛᒃᑯᑦ 33 ᐊᒻᒪᓗ 34. ᑮᓇᐅᔭᖅᑑᑎᒃᓴᖅᑖᖃᑦᑕᖅᑐᑦ ᐊᐅᓚᑦᓯᔾᔪᑎᒃᓴᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓂᒃ (ᑐᓐᖓᕕᒃᑯᓐᓂᒃ), ᑖᓐᓇ ᓴᖅᑭᕈᑕᐅᓯᒪᔪᖅ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᓄᑦ ᑲᒪᒋᔭᖃᖃᑦᑕᑐᒃᓴᒫᖑᓪᓗᓂ ᐱᕚᓪᓕᕈᑎᒃᓴᓂᒃ ᐊᒻᒪᓗ ᓴᐳᔾᔭᐅᓯᒪᒍᑎᒃᓴᖏᓐᓂᒃ ᐃᓄᐃᑦ ᐱᔪᒪᔭᖏᓐᓂᒃ ᓄᓇᕗᒻᒥ ᑕᒪᒃᑯᓄᓐᖓᖓᔪᓂᒃ ᓇᓗᓇᐃᖅᑕᐅᓯᒪᔪᓂᒃ ᓄᓇᕗᒻᒥ ᐊᖏᕈᑎᒻᒪᕆᒋᔭᐅᓯᒪᔪᑦ ᐊᑐᖅᑕᐅᑦᓯᐊᖁᓪᓗᒋᑦ ᓇᓚᐅᑦᓯᒪᑦᓯᐊᑐᒃᑯᑦ. ᐸᐸᑦᑎᔩᑦ ᐱᓐᖑᖅᑎᑕᐅᓚᐅᖅᐳᑦ ᐸᐸᑕᐅᔾᔪᑎᒃᓴᖏᓐᓄᑦ ᐊᖏᕈᑎᒃᑯᑦ 1994-ᒥ ᐊᒻᒪᓗ ᑎᒥᓐᖑᖅᑎᑕᐅᓪᓗᓂ ᓯᑉᑎᒻᕙ 1995-ᒥ ᑖᒃᑯᑎᒎᓇ ᑲᓇᑕᒥ ᑯᐊᐳᕇᓴᓄᑦ ᐱᖁᔭᑎᒍᑦ.

ᑲᒪᒋᔭᒃᓴᒫᕆᔭᖏᑦ

ᑲᒪᒋᔭᒃᓴᒫᕆᔭᖏᑦ ᓇᐅᑦᓯᑐᖅᑏᑦ ᐃᓚᒋᔭᐅᓪᓗᑎᒃ:

• ᐅᓄᖅᓯᕙᓪᓕᐊᓂᖅᓴᐅᓪᓗᑎᒃ ᑲᒪᒋᔭᒃᓴᒫᖏᑦ ᐃᑲᔪᖅᓱᐃᓂᕐᒧᑦ, ᑲᔪᖏᖅᓴᐃᓂᕐᒧᑦ, ᐊᒻᒪᓗ ᐅᖃᖅᑎᐅᖃᑦᑕᓂᕐᒥᒃ ᐅᖃᖃᑎᒌᓐᓂᐅᔪᓂᒃ, ᐋᖅᑭᐅᒪᑦᓯᓂᕐᒥᒃ, ᐋᖅᑭᒋᐊᕆᖃᑦᑕᓂᕐᒥᒃ ᐊᒻᒪᓗ ᑕᑯᑦᓴᐅᑎᑦᓯᖃᑦᑕᓂᕐᒥᒃ ᐃᑦᑕᕐᓂᓴᖃᕐᕕᐅᔪᓂᒃ ᐊᒻᒪᓗ ᐱᖁᑎᑐᖃᒥᓂᕐᓂᒃ
• ᐋᖅᑭᓱᖅᑕᐅᕙᓪᓕᐊᓂᖓ ᓄᓇᕗᒻᒥ ᐱᖅᑯᓯᓕᕆᕕᒋᔭᖏᓐᓄᑦ ᑐᑭᒧᐊᒍᑎᒃᓴᓂᒃ ᐃᑲᔫᑕᐅᓂᐊᖅᑐᓂᒃ ᐋᖅᑭᓱᖅᑕᐅᕙᓪᓕᐊᓂᖓᓂ ᑐᑭᒧᐊᒍᑎᒃᓴᓕᐊᖑᕙᓪᓕᐊᔪᖅ ᓄᓇᕗᒻᒥ ᐱᖅᑯᓯᓕᕆᕕᒋᔭᖏᓐᓄᑦ
• ᐋᖅᑭᓱᖅᑕᐅᕙᓪᓕᐊᓂᖓ ᐱᖅᑯᓯᓕᕆᕕᒃᑯᑦ ᐃᓕᓐᓂᐊᑎᑦᓯᓂᕐᒧᑦ ᐸᕐᓇᐅᑎᖏᓐᓂᒃ ᓴᖅᑭᕈᑕᐅᓂᐊᕐᓗᑎᒃ ᐃᖅᑲᓇᐃᔭᐅᑎᒃᓴᓂᒃ ᑕᐃᒃᑯᓄᖓ ᐱᖅᑯᓯᓕᕆᕕᖕᒥ ᐃᖅᑲᓇᐃᔭᖅᑐᓄᑦ ᑎᒍᓯᕙᓪᓕᐊᖁᓪᓗᒋᑦ ᐊᐅᓚᒍᓐᓇᖅᑕᖏᓐᓂᒃ ᐱᖅᑯᓯᓕᕆᓂᕐᒨᖓᔪᓂᒃ ᐱᓕᕆᐊᕆᔭᐅᖃᑦᑕᖅᑐᓂᒃ
• ᐃᓚᒋᔭᐅᓂᖏᑦ ᐱᔭᕆᐊᑭᓪᓕᑎᕆᔨᓄᑦ ᑖᒃᑯᓇᓐᖔᖅᓯᒪᔪᓂᒃ ᓄᓇᕗᑦ ᒐᕙᒪᖓᓂᒃ (ᒐᕙᒪᒃᑯᑦ), ᑐᓐᖓᕕᒃᑯᑦ ᐊᒻᒪᓗ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓂᒃ ᑎᑭᐅᑎᕙᓪᓕᐊᒍᑎᒃᓴᖏᓐᓄᑦ ᑐᕌᒐᖏᓐᓄᑦ ᓴᖅᑭᑎᑦᓯᕙᓪᓕᐊᓂᕐᒧᑦ ᓄᓇᕗᒻᒥ ᐱᖅᑯᓯᓕᕆᕝᕕᒃᓴᖓᓂᒃ. ᐃᓪᓗᕐᔪᐊᓕᐊᖑᔪᖅ ᐃᓂᒋᔭᐅᓇᔭᖅᑐᖅ ᐅᑎᖅᑎᑕᐅᔪᓄᑦ ᓄᓇᕗᒻᒥ ᐱᖁᑎᑐᖃᒥᓂᖏᓐᓂᒃ ᒫᓐᓇ ᓇᒥᑐᐃᓐᓇᑦᓯᐊᖅᑐᓂᒃ ᓯᓚᕐᔪᐊᒥ ᑕᑯᔭᒐᖃᕐᕕᖏᓐᓂ
• ᐃᓚᒋᔭᐅᖃᑦᑕᕐᓂᖅ ᐋᖅᑭᓱᖅᑕᐅᕙᓪᓕᐊᑎᓪᓗᒍ ᒐᕙᒪᒃᑯᑦ ᐊᑐᐊᒐᖓ ᐊᒻᒪᓗ ᒪᓕᒐᒃᓴᖓ ᐃᑦᑕᕐᓂᓴᓕᕆᓂᕐᒧᑦ, ᓄᓇᐃᑦ ᐊᑎᖏᓐᓂᒃ, ᐊᒻᒪᓗ ᐱᑐᖃᖁᑎᖏᓐᓄᑦ ᓄᓇᕗᒻᒥ
• ᑲᑐᔾᔨᖃᑎᒌᓐᓂᒃᑯᑦ ᓇᖕᒥᓂᖃᕐᓂᖅ, ᓄᓇᕗᑦ ᒐᕙᒪᒃᑯᖏᓐᓄᑦ, ᐃᓘᓐᓇᑦᓯᐊᖏᓐᓂᒃ ᐃᑦᑕᕐᓂᓴᖁᑎᒋᔭᐅᔪᓂᒃ ᐱᖁᑎᑐᖃᕐᓂᒃ ᓇᕝᕚᖅᑕᐅᖃᑦᑕᖅᓯᒪᔪᓂᒃ ᓄᓇᕗᑦ ᓄᓇᖁᑎᖏᓐᓂ
• ᕿᒥᕐᕈᓇᖃᑦᑕᕐᓂᖅ ᑐᒃᓯᕋᐅᑎᓂᒃ ᐱᔪᓐᓇᐅᑎᑖᕈᒪᔪᓄᑦ ᐃᑦᑕᕐᓂᓴᓕᕆᓂᕐᒧᑦ ᐊᐅᓚᑦᓯᓂᕐᒧᑦ, ᐃᓚᒋᔭᐅᓪᓗᑎᒃ ᐃᑦᑕᕐᓂᓴᖃᕐᕕᓐᓅᖃᑦᑕᕐᓂᖅ ᓄᓇᓄᑦ, ᐊᒻᒪᓗ ᖃᐅᔨᓴᖅᑕᐅᓂᖏᑦ ᐃᑦᑕᕐᓂᓴᖃᕐᕕᐅᔪᑦ ᓄᓇᑦ ᐊᒻᒪᓗ/ᐅᕝᕙᓘᓐᓃᑦ ᐊᓂᑕᐅᔪᓐᓇᕐᓂᖏᓐᓂᒃ ᐃᑦᑕᕐᓂᓴᐃᑦ ᐱᖁᑎᑐᖃᒥᓃᑦ.
• ᑎᑎᕋᖅᑕᐅᓂᖏᑦ ᐃᓄᖕᓂᒃ ᐊᑎᖃᖅᑎᑕᐅᓂᖏᑦ ᓄᓇᐃᑦ ᓄᓇᓐᖑᐊᓂ ᖃᐅᔨᒪᔭᐅᔾᔪᑎᒃᓴᖏᓐᓄᑦ ᓄᓇᕗᒻᒥ ᑕᑯᑦᓴᐅᔪᓐᓇᖁᓪᓗᒋᑦ ᐃᓕᓴᕆᔭᐅᓯᒪᔪᓂ ᓄᓇᓐᖑᐊᓂ ᓄᓇᕗᒻᒥ