ᐱᓕᕆᐊᖑᔪᑦ: ᐃᓕᓐᓂᐊᑎᑦᓯᒋᐊᒃᑲᓐᓂᕈᑎᒃᓴᓕᐊᖑᓯᒪᔪᑦ  

ᐃᓕᓐᓂᐊᑎᑦᓯᑲᓐᓂᕈᑎᒃᓴᓕᐊᖑᓯᒪᕙᑦᑐᑦ ᐱᑕᖃᕆᐊᖃᒻᒪᕆᑉᐳᑦ ᐃᓄᖕᓄᑦ ᐃᓕᓐᓂᐊᕈᒪᔪᓄᑦ ᐃᑦᑕᕐᓂᓴᓕᕆᓂᕐᒥᒃ ᐃᖅᑲᓇᐃᔮᒻᒪᕆᒋᓂᐊᕐᓗᓂᐅᒃ. ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᑲᔪᖏᖅᓴᐃᒋᐊᒃᑲᓐᓂᕈᒪᕗᑦ ᐃᑦᑕᕐᓂᓴᓕᕆᓂᕐᒨᖓᔪᓂᒃ ᐃᓕᓐᓂᐊᓂᕐᒥᒃ ᖁᑦᓯᓂᖅᓴᒥᒃ ᐱᔪᒐᖅᓴᐅᑎᖃᖅᑐᑎᒃ ᐃᓄᐃᑦ ᐃᓚᒋᔭᐅᒋᐊᒃᑲᓐᓂᖁᓪᓗᒋᑦ ᑕᒪᑦᓱᒥᖓ ᐃᖅᑲᓇᐃᔮᖃᕐᓂᕐᒥᒃ. ᒫᓐᓇ ᖃᑦᓰᓐᓇᑯᓘᒻᒪᑕ ᐃᓕᓐᓂᐊᕈᑎᒃᓴᐅᖃᑦᑕᖅᑐᑦ ᐃᓄᖕᓄᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕈᑎᒃᓴᐅᔪᑦ ᐃᑦᑕᕐᓂᓴᓕᕆᓂᕐᒥᒃ. ᐃᓕᓐᓂᐊᑎᑦᓯᒋᐊᒃᑲᓐᓂᕈᑎᒃᓴᓕᐊᖑᓯᒪᔪᑦ ᑐᕌᖓᔪᑦ ᑲᓱᖅᑎᓯᒪᒍᑎᒃᓴᐅᓇᔭᖅᑐᓂᒃ ᐃᓄᖕᓄᑦ ᐱᔪᒪᓂᖃᖅᑐᓄᑦ ᓈᖕᒪᑦᑐᒥᒃ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᐊᖑᔪᓂᒃ.

ᐃᓕᓐᓂᐊᑎᑦᓯᑲᓐᓂᕈᑎᒃᓴᓕᐊᖑᓯᒪᕙᑦᑐᑦ ᐃᑲᔫᑎᖃᕈᓐᓇᖅᑐᑦ ᑮᓇᐅᔾᔭᒃᓴᐅᑎᓂᒃ ᓯᑕᒪᓄᑦ ᐃᓕᓐᓂᐊᖅᑎᓄᑦ. ᐃᑦᑕᕐᓂᓴᓕᕆᔩᑦ ᓂᕆᐅᕝᕕᒋᔭᐅᔪᑦ ᐊᑭᓕᖅᓱᐃᖃᑦᑕᓂᐊᕐᓂᖏᓐᓂᒃ ᐃᓕᓐᓂᐊᖅᑎᓄᑦ ᓂᕆᔭᒃᓴᓂᒃ ᓂᐅᕕᖅᓯᒪᓂᕐᒥᒃ ᑕᒻᒫᖅᓯᒪᓂᖏᓐᓂ ᓅᓯᒪᕕᒋᔭᖓᓂ, ᐃᓕᓐᓂᐊᑎᑦᓯᓂᕐᒥᒃ, ᐊᒻᒪᓗ ᖃᐅᔨᓴᕐᓂᕐᒥᒃ ᐃᓕᓐᓂᐊᖅᑏᑦ ᐱᔪᓐᓇᕐᓂᕆᔭᖏᓐᓂᒃ. ᓱᓕᒃᑲᓐᓂᖅ ᐊᓯᖏᑦ ᖁᑦᓯᓂᖅᓴᒥᒃ ᐱᔪᓐᓇᕐᓂᐅᔭᕆᐊᓖᑦ ᑖᒃᑯᓇᓐᖔᖅᓯᒪᔪᑦ ᐃᓕᓐᓂᐊᖅᑎᒧᑦ ᐃᓕᓐᓂᐊᕐᕕᒋᔭᖓᓂᒃ (ᐃᓕᓐᓂᐊᕐᕕᐊᓗᒻᒥᒃ ᖁᕝᕙᕆᐊᕈᑎᑖᖅᐸᓪᓕᐊᓇᓱᐊᖅᐸᑦ), ᐃᓕᓐᓂᐊᖅᑏᑦ ᓂᕆᐅᕝᕕᒋᔭᐅᕗᑦ ᑐᓂᓯᓂᐊᕐᓂᖏᓐᓂᒃ ᓇᐃᑦᑐᒥᒃ ᐅᓂᒃᑳᒥᒃ ᖃᐅᔨᕙᓪᓕᕈᑎᒋᓚᐅᖅᑕᖏᓐᓂᒃ ᐊᑑᑎᓚᐅᖅᑕᖏᓐᓂᒃ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᑯᓐᓂᒃ.