ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᓴᕆᒪᓱᑉᐳᑦ ᑐᓴᖅᑎᑦᓯᒋᐊᒃᓴᖅ ᓴᖅᑭᖅᑎᑕᐅᓚᐅᕐᓂᖓᓂᒃ ᓄᑖᖅ ᐃᓕᓐᓂᐊᓯᐊᖅᑐᒧᑦ ᑐᓐᓂᖅᑯᑎᒋᔭᐅᖃᑦᑕᓂᐊᖅᑐᒧᑦ ᐃᑲᔫᑎ ᐊᑎᖃᖃᑕᐅᔪᒧᑦ ᐃᓕᓐᓂᐊᑲᓐᓂᖅᑐᒧᑦ ᐃᓕᓐᓂᐊᑎᑦᓯᒍᑕᐅᔪᓂᒃ ᐱᖅᑯᓯᑐᖃᓕᕆᓂᕐᒧᑦ. ᑕᒪᓐᓇ ᐊᑐᖃᑦᑕᖅᑕᕗᑦ ᐅᐱᒍᓱᓐᓂᑎᓐᓂᒃ ᓴᖅᑭᐅᒪᑎᑦᓯᑲᓐᓂᕈᒪᓂᕐᒧᑦ ᓯᕗᓕᕆᓚᐅᖅᑕᑎᓐᓂᒃ ᑭᖑᓂᖔᑦᑎᓐᓂ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓂ ᑲᑎᒪᔨᐅᖃᑕᐅᓚᐅᖅᑐᒥᒃ ᐊᓚᐃᓐ ᒪᒃᑖᖅ ᑖᓐᓇ ᐊᓚᐃᓐ ᑲᑎᒪᔨᐅᖃᑕᐅᖃᑦᑕᓚᐅᖅᑐᖅ ᐱᓇᓱᐊᖅᑐᒻᒪᕆᐅᓪᓗᓂ ᖁᕕᐊᒋᔭᖃᖅᑐᓂᓗ ᐃᑦᑕᕐᓂᓴᓕᕆᓂᕐᒥᒃ ᒥᑦᑎᒪᑕᓕᒻᒥ ᖃᓂᒋᔮᓂᓗ. ᑲᔪᖏᖅᓴᐃᒋᐊᒃᑲᓐᓂᕈᒪᒻᒥᔪᒍᑦ ᐃᓄᖕᓂᒃ ᐃᑦᑕᕐᓂᓴᓕᕆᓂᕐᒥᒃ ᐃᖅᑲᓇᐃᔮᖅᑖᐸᓪᓕᐊᖃᑦᑕᖁᔨᓪᓗᑕ. ᑖᓐᓇ ᐃᓕᓐᓂᐊᓯᐊᖅᑐᒧᑦ ᑐᓐᓂᖅᑯᑎᒋᔭᖃᑦᑕᓂᐊᖅᑐᖅ ᓴᖅᑭᖅᑕᐅᔪᒫᕐᓂᐊᖅᑐᖅ ᐆᒪᑎᑕᐅᓂᖓᓂ ᓄᓇᕗᒻᒥ ᖁᓕᒋᓕᖅᑕᖓᓂ ᓇᓪᓕᐅᓂᖅᓯᐅᕈᑕᐅᓂᖓᓂ - ᓇᓪᓕᐅᓂᖅᓯᐅᕐᓂᖃᕐᓂᐊᑎᓪᓗᑕ ᐱᕙᓪᓕᐊᓯᒪᓂᑦᑎᓐᓂᒃ ᐅᓪᓗᒥᒧᑦ ᑎᑭᐅᑎᓂᑦᑎᓐᓂ ᐊᒻᒪᓗ ᓇᒧᓐᖓᐸᓪᓕᐊᓂᐊᕐᓂᑎᓐᓂᒃ. ᕗᐃᓕᐊᒻ ᐱᕗᕆᔾ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ ᐊᐅᓚᑦᓯᔨᒻᒪᕆᖓ ᑲᒪᔭᕆᐊᖃᖅᓱᕆᑦᓯᒻᒪᑦ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ ᐱᓕᕆᐊᖃᕆᐊᖃᕐᓂᖏᓐᓂᒃ ᑲᔪᖏᖅᓴᐃᓂᕐᒥᒃ “ᐃᓄᐃᑦ ᐊᔪᓐᖏᑎᑕᐅᒋᐊᖃᕐᓂᖏᓐᓂᒃ ᓴᓐᖏᓂᕆᔭᒥᒍᑦ ᖃᐅᔨᓇᓱᐊᖃᑦᑕᓂᕐᒥᒃ ᐊᒻᒪᓗ ᓴᖅᑭᐅᒪᑎᑦᓯᖃᑦᑕᓂᕐᒥᒃ ᐊᑐᖃᑦᑕᖅᓯᒪᔭᖏᓐᓂᒃ ᐱᕙᓪᓕᐊᓂᖃᕐᓗᑎᒃ ᐊᔪᓐᖏᑐᕐᔪᐊᖑᓂᕐᒥᒍᑦ”.

“ᐊᓚᐃᓐ ᒪᒃᑖᖅ ᒥᑦᑎᒪᑕᓕᒻᒥᐅᖅ ᐃᑲᔪᖅᓯᒪᔪᒻᒪᕆᐊᓘᒻᒪᑦ ᖃᐅᔨᒪᔪᕐᔪᐊᖑᓂᕐᒥᒍᑦ ᐃᓄᐃᑦ ᐃᓕᖅᑯᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓄᑦ ᐊᒻᒪᓗ ᐃᓄᖕᓄᑦ ᓄᓇᕗᒻᒥ. ᑲᒪᖃᑦᑕᖅᓯᒪᓂᖓ ᐱᖕᒪᕆᐅᑕᐅᓂᖅᓴᓂᒃ ᓄᓇᕗᒻᒨᖓᔪᓂᒃ ᑕᐃᒫᑦᓴᐃᓐᓇᖅ ᐱᓇᓱᐊᖅᑐᒻᒪᕆᐅᓯᒪᒻᒪᑦ ᑲᑦᓱᖓᐃᑦᓯᐊᖅᑐᓂ ᐃᑦᑕᕐᓂᓴᓕᕆᓂᕐᒧᑦ ᐊᒻᒪᓗ ᐱᖅᑯᓯᑐᖃᓕᕆᓂᕐᒧᑦ ᐊᖏᕐᕋᖅᓯᒪᓪᓗᓂ ᓄᓇᒥᓐᓂ.” ᐅᖃᓚᐅᖅᑐᖅ ᓘᑭ ᓱᓗᒃ, ᐊᖏᔪᖅᑳᖓ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ.

ᐊᑕᐅᓯᖅ ᐃᓕᓐᓂᐊᓯᐊᖅᑐᒧᑦ ᑐᓐᓂᖅᑯᑎᒃᓴᐅᔪᖅ, ᐊᑭᖃᕋᔭᓐᖑᐊᖅᑐᓂ $5,000.00-ᓂᒃ, ᑐᕌᖓᔪᖅ ᐃᓕᓐᓂᐊᖅᑎᓄᑦ ᐃᓕᓐᓂᐊᕈᑎᓕᓐᓄᑦ 60% ᐅᖓᑖᓂ ᐃᓕᓐᓂᐊᖅᑐᓂᒃ ᐱᖅᑯᓯᑐᖃᓕᕆᓂᕐᒥᒃ ᐊᒻᒪᓗ ᐱᖅᑯᓯᑐᖃᓕᕆᓂᕐᒨᖓᔪᓂᒃ ᐃᓕᓐᓂᐊᓂᕐᓂᒃ. ᐃᓕᓐᓂᐊᕈᑎᒋᔭᐅᔪᑦ ᐃᓚᒋᔭᐅᓪᓗᑎᒃ ᐃᑦᑕᕐᓂᓴᓕᕆᓂᖅ, ᑕᑯᔭᒐᖃᕐᕕᖕᒨᖓᔪᓂᒃ ᐃᓕᓐᓂᐊᕐᓃᑦ, ᓴᐳᔾᔨᓯᒪᒍᑎᒃᓴᓂᒃ ᑐᕌᒐᓂᓖᑦ, ᐃᓄᐃᑦ ᐃᓕᖅᑯᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓕᓐᓂᐊᕐᓃᑦ, ᐃᓄᐃᑦ/ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑕᐅᓂᖏᑦ.

ᐊᐅᓚᑦᓯᔾᔪᑎᒃᓴᓕᐊᖑᓯᒪᔪᑎᒍᑦ, ᑐᒃᓯᕋᐅᑏᑦ ᑕᑕᑎᒐᑦᓴᑦ ᐊᒻᒪᓗ ᑐᑭᓯᖏᐊᕈᑎᒃᓴᑦ ᐊᑐᐃᓐᓇᐅᔪᑦ ᖃᕆᓴᐅᔭᒃᑯᑦ ᑕᓕᖅᐱᐊᓂ ᓇᓗᓇᐃᖅᓯᒪᔭᐅᔪᑦ. ᐃᕐᖐᓐᓈᕈᑎᒃᑯᑦᑕᐅᖅ ᑐᒃᓯᕋᕈᓐᓇᕐᒥᔪᑎᑦ ᐅᕙᓐᖓᑦ ᖃᕆᓴᐅᔭᒃᑯᑦ ᑐᔪᖅᑕᐅᔪᒪᓗᑎᑦ ᐅᕝᕙᓘᓐᓃᑦ ᓱᒃᑲᔪᒃᑯᑦ ᐊᐅᓪᓚᑎᑦᓯᕕᐅᔪᒪᓗᑎᑦ ᑐᑭᓯᒋᐊᒃᑲᓐᓂᕈᑎᒃᓴᓂᒃ. ᓇᓗᓇᐃᕐᓂᐊᖅᑕᕗᑦ ᐱᓇᓱᐊᕈᒪᔪᓄᑦ ᐱᓇᓱᐊᕐᕕᒃᓴᐅᔪᖅ ᑐᒃᓯᕋᐅᑎᓂᒃ ᒪᐃᒥ, ᔫᓂᒥ ᐃᓱᓕᕝᕕᖃᕐᓗᓂ.

ᑐᑭᓯᒋᐊᒃᑲᓂᕐᕕᒃᓴᖅ, ᐅᖃᕐᕕᒋᓗᒍ ᐄᕆᑲ ᓯᐊᒻᑯ ᐅᖄᓚᐅᑖ (867) 979-0731,