ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᓴᕆᒪᓱᑉᐳᑦ ᑐᓴᖅᑎᑦᓯᒋᐊᒃᓴᖅ ᓴᖅᑭᖅᑎᑕᐅᓚᐅᕐᓂᖓᓂᒃ ᓄᑖᖅ ᐃᓕᓐᓂᐊᓯᐊᖅᑐᒧᑦ ᑐᓐᓂᖅᑯᑎᒋᔭᐅᖃᑦᑕᓂᐊᖅᑐᒧᑦ ᐃᑲᔫᑎ ᐊᑎᖃᖃᑕᐅᔪᒧᑦ ᐃᓕᓐᓂᐊᑲᓐᓂᖅᑐᒧᑦ ᐃᓕᓐᓂᐊᑎᑦᓯᒍᑕᐅᔪᓂᒃ ᐱᖅᑯᓯᑐᖃᓕᕆᓂᕐᒧᑦ. ᑕᒪᓐᓇ ᐊᑐᖃᑦᑕᖅᑕᕗᑦ ᐅᐱᒍᓱᓐᓂᑎᓐᓂᒃ ᓴᖅᑭᐅᒪᑎᑦᓯᑲᓐᓂᕈᒪᓂᕐᒧᑦ ᓯᕗᓕᕆᓚᐅᖅᑕᑎᓐᓂᒃ ᑭᖑᓂᖔᑦᑎᓐᓂ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓂ ᑲᑎᒪᔨᐅᖃᑕᐅᓚᐅᖅᑐᒥᒃ ᐊᓚᐃᓐ ᒪᒃᑖᖅ ᑖᓐᓇ ᐊᓚᐃᓐ ᑲᑎᒪᔨᐅᖃᑕᐅᖃᑦᑕᓚᐅᖅᑐᖅ ᐱᓇᓱᐊᖅᑐᒻᒪᕆᐅᓪᓗᓂ ᖁᕕᐊᒋᔭᖃᖅᑐᓂᓗ ᐃᑦᑕᕐᓂᓴᓕᕆᓂᕐᒥᒃ ᒥᑦᑎᒪᑕᓕᒻᒥ ᖃᓂᒋᔮᓂᓗ. ᑲᔪᖏᖅᓴᐃᒋᐊᒃᑲᓐᓂᕈᒪᒻᒥᔪᒍᑦ ᐃᓄᖕᓂᒃ ᐃᑦᑕᕐᓂᓴᓕᕆᓂᕐᒥᒃ ᐃᖅᑲᓇᐃᔮᖅᑖᐸᓪᓕᐊᖃᑦᑕᖁᔨᓪᓗᑕ. ᑖᓐᓇ ᐃᓕᓐᓂᐊᓯᐊᖅᑐᒧᑦ ᑐᓐᓂᖅᑯᑎᒋᔭᖃᑦᑕᓂᐊᖅᑐᖅ ᓴᖅᑭᖅᑕᐅᔪᒫᕐᓂᐊᖅᑐᖅ ᐆᒪᑎᑕᐅᓂᖓᓂ ᓄᓇᕗᒻᒥ ᖁᓕᒋᓕᖅᑕᖓᓂ ᓇᓪᓕᐅᓂᖅᓯᐅᕈᑕᐅᓂᖓᓂ - ᓇᓪᓕᐅᓂᖅᓯᐅᕐᓂᖃᕐᓂᐊᑎᓪᓗᑕ ᐱᕙᓪᓕᐊᓯᒪᓂᑦᑎᓐᓂᒃ ᐅᓪᓗᒥᒧᑦ ᑎᑭᐅᑎᓂᑦᑎᓐᓂ ᐊᒻᒪᓗ ᓇᒧᓐᖓᐸᓪᓕᐊᓂᐊᕐᓂᑎᓐᓂᒃ. ᕗᐃᓕᐊᒻ ᐱᕗᕆᔾ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ ᐊᐅᓚᑦᓯᔨᒻᒪᕆᖓ ᑲᒪᔭᕆᐊᖃᖅᓱᕆᑦᓯᒻᒪᑦ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ ᐱᓕᕆᐊᖃᕆᐊᖃᕐᓂᖏᓐᓂᒃ ᑲᔪᖏᖅᓴᐃᓂᕐᒥᒃ “ᐃᓄᐃᑦ ᐊᔪᓐᖏᑎᑕᐅᒋᐊᖃᕐᓂᖏᓐᓂᒃ ᓴᓐᖏᓂᕆᔭᒥᒍᑦ ᖃᐅᔨᓇᓱᐊᖃᑦᑕᓂᕐᒥᒃ ᐊᒻᒪᓗ ᓴᖅᑭᐅᒪᑎᑦᓯᖃᑦᑕᓂᕐᒥᒃ ᐊᑐᖃᑦᑕᖅᓯᒪᔭᖏᓐᓂᒃ ᐱᕙᓪᓕᐊᓂᖃᕐᓗᑎᒃ ᐊᔪᓐᖏᑐᕐᔪᐊᖑᓂᕐᒥᒍᑦ”.

“ᐊᓚᐃᓐ ᒪᒃᑖᖅ ᒥᑦᑎᒪᑕᓕᒻᒥᐅᖅ ᐃᑲᔪᖅᓯᒪᔪᒻᒪᕆᐊᓘᒻᒪᑦ ᖃᐅᔨᒪᔪᕐᔪᐊᖑᓂᕐᒥᒍᑦ ᐃᓄᐃᑦ ᐃᓕᖅᑯᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓄᑦ ᐊᒻᒪᓗ ᐃᓄᖕᓄᑦ ᓄᓇᕗᒻᒥ. ᑲᒪᖃᑦᑕᖅᓯᒪᓂᖓ ᐱᖕᒪᕆᐅᑕᐅᓂᖅᓴᓂᒃ ᓄᓇᕗᒻᒨᖓᔪᓂᒃ ᑕᐃᒫᑦᓴᐃᓐᓇᖅ ᐱᓇᓱᐊᖅᑐᒻᒪᕆᐅᓯᒪᒻᒪᑦ ᑲᑦᓱᖓᐃᑦᓯᐊᖅᑐᓂ ᐃᑦᑕᕐᓂᓴᓕᕆᓂᕐᒧᑦ ᐊᒻᒪᓗ ᐱᖅᑯᓯᑐᖃᓕᕆᓂᕐᒧᑦ ᐊᖏᕐᕋᖅᓯᒪᓪᓗᓂ ᓄᓇᒥᓐᓂ.” ᐅᖃᓚᐅᖅᑐᖅ ᓘᑭ ᓱᓗᒃ, ᐊᖏᔪᖅᑳᖓ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ.

ᐊᑕᐅᓯᖅ ᐃᓕᓐᓂᐊᓯᐊᖅᑐᒧᑦ ᑐᓐᓂᖅᑯᑎᒃᓴᐅᔪᖅ, ᐊᑭᖃᕋᔭᓐᖑᐊᖅᑐᓂ $5,000.00-ᓂᒃ, ᑐᕌᖓᔪᖅ ᐃᓕᓐᓂᐊᖅᑎᓄᑦ ᐃᓕᓐᓂᐊᕈᑎᓕᓐᓄᑦ 60% ᐅᖓᑖᓂ ᐃᓕᓐᓂᐊᖅᑐᓂᒃ ᐱᖅᑯᓯᑐᖃᓕᕆᓂᕐᒥᒃ ᐊᒻᒪᓗ ᐱᖅᑯᓯᑐᖃᓕᕆᓂᕐᒨᖓᔪᓂᒃ ᐃᓕᓐᓂᐊᓂᕐᓂᒃ. ᐃᓕᓐᓂᐊᕈᑎᒋᔭᐅᔪᑦ ᐃᓚᒋᔭᐅᓪᓗᑎᒃ ᐃᑦᑕᕐᓂᓴᓕᕆᓂᖅ, ᑕᑯᔭᒐᖃᕐᕕᖕᒨᖓᔪᓂᒃ ᐃᓕᓐᓂᐊᕐᓃᑦ, ᓴᐳᔾᔨᓯᒪᒍᑎᒃᓴᓂᒃ ᑐᕌᒐᓂᓖᑦ, ᐃᓄᐃᑦ ᐃᓕᖅᑯᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓕᓐᓂᐊᕐᓃᑦ, ᐃᓄᐃᑦ/ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑕᐅᓂᖏᑦ.

ᑐᓂᔭᐅᖃᑦᑕᕐᓯᒪᔪᑦ ᐊᓚᐃᓐ ᒪᒃᑖᖅ ᑐᓐᓂᖅᑯᓯᐊᒥᒃ ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᑲᓐᓂᖅᑐᒧᑦ

2014 -2015 – ᕇᐱᑲ ᒥᐊᓐᔅ (ᓄᓇᕗᑦ ᓯᕗᓂᒃᓴᕗᑦ/ᑳᕈᑕᓐ ᐃᓕᓐᓂᐊᕕᒡᔪᐊᖓ)

ᕇᐱᑲ ᐃᓕᓴᐃᔨ ᐃᓄᐃᑦ ᐊᑐᖃᑦᑕᕐᓯᒪᔭᖏᓐᓂᒃ ᐊᒻᒪᓗ ᐃᓄᒃᑎᑐᑦ ᓄᓇᕗᑦ ᓯᕗᓂᒃᓴᕗᒻᒥ ᐋᑐᕚᒥ. ᒫᓐᓇ ᐃᓕᓐᓂᐊᖅᑐᖅ ᓇᓗᓇᐃᒃᑯᑕᒻᒪᕆᑦᑖᕋᓱᐊᕐᓂᕐᒧᑦ ᑳᕈᑕᓐ ᐃᓕᓐᓂᐊᕕᒡᔪᐊᖓᓂ ᐃᓕᓐᓂᐊᕈᑎᖃᕐᓱᓂ ᐊᑐᖃᑦᑕᓂᕐᒥᒃ ᓄᓇᒥ ᓄᓇᒋᔭᐅᖃᑦᑕᕐᓯᒪᔪᓂᒃ ᐃᑲᔫᑎᒃᓴᓂᒃ ᐃᓄᐃᑦ ᖃᐅᔨᒪᓂᖏᓐᓄᑦ ᑲᓲᒪᒍᑎᒃᓴᓂᒃ ᐃᓐᓇᕐᓄᑦ ᒪᒃᑯᑦᑐᓄᓪᓗ ᑐᓴᐅᒪᔭᐅᔾᔪᑎᒃᓴᖏᓐᓄᑦ. ᕇᐱᑲ ᐱᕚᓪᓕᑎᑦᓯᕙᓪᓕᐊᔪᒻᒪᕆᐅᔪᖅ ᐃᓄᐃᑦ ᖃᐅᔨᒪᓂᖏᓐᓂᒃ, ᐱᖕᒪᕆᐅᔪᖁᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᖏᓐᓂᒃ ᐱᓕᕆᐊᖃᖃᑦᑕᓂᕐᒥᒍᑦ ᐊᒥᓱᒻᒪᕆᓐᓂᒃ ᓄᓇᕗᑦ ᓯᕗᓂᒃᓴᕗᒻᒥ ᐊᒻᒪᓗ ᑳᕈᑕᓐ ᐃᓕᓐᓂᐊᕕᒡᔪᐊᖓᓂ ᐃᓚᒋᔭᐅᓪᓗᑎᒃ ᐃᓚᒋᔭᐅᓂᕐᒥᒍᑦ ᐃᓕᓐᓂᐊᕕᒡᔪᐊᒥ ᐃᓕᓐᓂᐊᖅᑐᓕᕆᔨᒃᑯᑦ ᖃᐅᔨᒪᔨᑕᑦ ᑲᑎᒪᔨᕋᓛᖏᓐᓄᑦ ᓄᓇᖃᖅᑳᓯᒪᔪᑦ ᐃᓚᒋᔭᐅᖃᑦᑕᖁᓪᓗᒋᑦ ᐊᒻᒪᓗ ᑭᒡᒐᖅᑐᐃᔨᖃᖁᓪᓗᒋᑦ ᐃᓕᓐᓂᐊᕕᒡᔪᐊᒃᑯᑦ, ᐊᐅᓚᑦᓯᓂᕐᒥᒃ ᐊᐅᓚᑦᓯᓂᕐᒥᒃ ᑕᑯᓐᓇᕋᑦᓴᐅᓂᖏᓐᓂᒃ ᐃᓕᓐᓂᐊᑎᑦᓯᖃᑦᑕᓂᕐᒥᒃ ᓄᓇᕗᑦ ᓯᕗᓂᒃᓴᕗᒻᒥ ᐃᓕᓐᓂᐊᖅᑐᑦ ᐊᒻᒪᓗ ᑲᑎᒪᕐᔪᐊᖅᑐᓅᖃᑦᑕᕐᓂᖏᓐᓂᒃ. ᐃᖅᑲᓇᐃᔮᖓ ᑲᓲᒪᔪᒻᒪᕆᐅᔪᖅ ᐃᑲᔪᕐᓂᕐᒥᒃ ᓄᓇᓖᑦ ᒪᑭᑉᐸᓪᓕᐊᒍᑎᒃᓴᖏᓐᓂᒃ ᐃᓄᐃᑦ ᖃᐅᔨᒪᓂᖏᓐᓂᒃ ᐅᓂᒃᑳᖃᑦᑕᓂᒃᑯᑦ ᓄᓇᕗᒻᒥ ᓄᓇᓕᓐᓂ ᑭᓯᓂᐊᑦᑕᐅᖅ ᑲᓲᒪᓂᖃᕐᒥᔪᖅ ᐅᑭᐅᖅᑕᖅᑐᒥ ᓄᓇᓕᖕᓄᑦ ᐊᒻᒪᓗ ᖃᓪᓗᓈᓂ ᖃᐅᔨᓴᖅᑎᓄᑦ ᐃᑲᔫᑎᒃᓴᐅᔪᒥᒃ ᑕᒪᒃᑭᓐᓄᑦ ᑲᑐᔾᔨᖃᑎᒌᓐᓄᑦ.

2013-14 – ᑲᓚᐃᑕ ᐅᖓᖓᐃ (ᐊᐅᒑᑯᐃᓐ ᓯᓚᑦᑐᓴᕐᕕᒃ)

ᑲᓚᐃᑕᓐ ᓄᓇᖃᖅᑳᕐᓯᒪᔪᓂᒃ ᐃᓕᓐᓂᐊᖅᑐᖅ ᐊᐅᒑᓐᑯᐊᓐ ᓯᓚᑦᑐᓴᕐᕕᖓᓂ ᐋᓐᑎᕆᐅᒥ. ᓱᓕᒃᑲᓐᓂᖅ ᑐᓂᓯᒪᑦᓯᐊᓂᕐᒥᒍᑦ ᐱᓕᕆᐊᓕᒃ ᐊᒻᒪᓗ ᐱᕚᓪᓕᑎᑦᓯᓂᕐᒥᒃ ᐃᓄᒃᑎᑐᑦ ᐊᒡᒐᒃᑯᑦ ᐅᖃᓕᒪᓂᕐᒥᒃ (ISL). ᐱᓇᓱᐊᖃᑕᐅᖃᑦᑕᕐᓯᒪᓂᕐᒥᒍᑦ ᓯᑕᒪᐅᔪᖅᑐᓂᒃ ᐊᕐᕌᒎᓂᒃ ᐃᓄᒃᑎᑐᑦ ᐊᒡᒐᒃᑯᑦ ᐅᖃᓕᒪᓂᕐᒥᒃ ᐱᓕᕆᖃᑎᒋᔭᖏᑦ ᓄᓇᕗᒻᒥ ᐱᒡᒐᖅᑐᑦ ᒪᑭᓐᓇᓱᐊᖅᑏᑦ ᓴᓴᐃᔭᑎᒃᑯᑦ, ᒪᒡᒋᐅ ᐃᓕᓐᓂᐊᕕᒡᔪᐊᖓ, ᐊᒻᒪᓗ ᐊᓯᖏᑦ ᐊᒥᓱᑦ ᐊᔾᔨᒌᓐᖏᑦᑐᑦ ᓄᓇᓕᖏᓐᓂ ᓄᓇᕗᒻᒥ ᐊᒻᒪᓗ ᓯᓚᑖᓂ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᑕ.

2012-2013 – ᐋᓐᑐᕈ ᐋᕆᐊᒃ (ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃ)

ᐋᓐᑐᕈ, ᒥᑦᑎᒪᑕᓕᖕᒥᐅᑦᓴᔭ ᒫᓐᓇ ᐃᓕᓐᓂᐊᖅᑐᖅ ᐊᕙᑎᓕᕆᓂᕐᒥᒃ ᐃᓕᓴᕆᔭᐅᔾᔪᑎᑖᕐᓂᕐᒧᑦ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᖓᓂ. ᖁᕕᐊᒋᔭᓕᒃ ᐃᓄᐃᑦ ᐊᑐᖃᑦᑕᕐᓯᒪᔭᖏᓐᓂᒃ ᐊᒻᒪᓗ ᐃᓕᖅᑯᓯᖓᓂᒃ ᓇᓗᓇᐃᕐᓯᒪᓪᓗᓂ ᖁᕕᐊᒋᔭᖃᕐᓂᖓ ᐊᕐᕌᒍᓂ ᖄᖏᖅᑐᓂ ᐃᓚᒋᔭᐅᖃᑦᑕᕐᓯᒪᓂᕐᒥᓄᑦ ᐊᔾᔨᒌᓐᖏᑦᑐᓂ ᐱᓕᕆᐊᓂ ᓄᓇᕗᒻᒥ. ᐱᓇᓱᐊᖃᑕᐅᓪᓗᓂ ᓇᐅᑦᓯᑐᖅᑎᒃᑯᑦ ᐃᓕᓐᓂᐊᑲᓐᓂᑎᑦᓯᒍᑎᖏᓐᓂ ᑲᓇᑕᒥ ᒥᕐᖑᐃᓯᕐᕕᖕᓂ ᒥᐊᓂᕐᓯᓂᕐᒧᑦ ᐃᑲᔪᖅᑎᐅᓚᐅᖅᑐᖅ ᐃᑦᑕᕐᓂᓴᓕᕆᔪᖃᖅᑎᓪᓗᒍ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᖓᓂ ᓇᐅᔮᑦ ᖃᓂᒋᔮᓂ 2012-ᒥ. ᐱᓇᓱᐊᕐᓯᒪᓂᖓ ᑲᓇᑕᒥ ᒥᕐᖑᐃᓯᕐᕕᖁᑎᖏᓐᓂ ᐃᓚᒋᔭᐅᓪᓗᓂ ᐃᖅᑲᓇᐃᔮᖃᕐᓂᖅ ᐊᑐᖅᑕᐅᖃᑦᑕᕐᓯᒪᔪᓂᒃ ᐅᓂᒃᑳᓂᒃ ᑎᑎᕋᕐᓯᒪᔪᓂᒃ.

ᓯᕗᓂᕐᒥᓂ, ᐋᓐᑐᕈ ᐅᖃᓚᐅᖅᑐᖅ ᐱᐊᓂᖅᑳᕈᒪᓂᕋᕐᓱᓂ ᐊᕙᑎᓕᕆᓂᕐᒥᒃ ᐃᓕᓐᓂᐊᓂᕐᒥᓂᒃ ᐊᓱᐃᓛᒃ ᐃᖅᑲᓇᐃᔮᖅᑖᐸᓪᓕᐊᓕᕐᓗᓂ ᓄᓇᕗᒻᒥ ᐃᑦᑕᕐᓂᓴᓕᕆᓂᕐᒥᒃ.

2011-2012 – ᔨᐊᓯᑲ ᑰᑦᑎᖅ (ᕕᓕᒥᖕ ᓯᓚᑦᑐᓴᕐᕕᖓ)

ᔨᐊᓯᑲ ᒫᓐᓇ ᐱᒋᐊᕐᐸᓪᓕᐊᔪᖅ ᒪᕐᕉᓐᓂᒃ ᐊᕐᕌᒎᓐᓂᒃ ᐃᓕᓴᕆᔭᐅᔾᔪᑎᑖᕋᓱᐊᕐᓂᕐᒥᒃ ᓄᐊᑦᓯᓂᕐᒥᒃ ᔭᒐᔾᔭᐃᕐᓯᒪᑎᑦᓯᓂᕐᒧᑦ ᐊᒻᒪᓗ ᐊᐅᓚᑦᓯᓂᕐᒥᒃ ᐱᑐᕗᕈ, ᐋᓐᑎᕆᐅᒥ. ᐃᓕᓐᓂᐊᓂᐊᖅᑐᖅ ᐋᖅᑭᑦᓱᐃᓂᕐᒥᒃ ᐋᖅᑭᐅᒪᑎᑦᓯᓂᕐᒥᓪᓗ ᐃᓄᐃᑦ ᐱᖁᑎᑐᖃᒥᓂᖏᓐᓂᒃ ᐊᑐᖅᑕᐅᒍᓐᓇᕐᓯᖁᓪᓗᒋᑦ ᐃᓕᓐᓂᐊᕈᑕᐅᓗᑎᒃ ᐱᕚᓪᓕᕈᑕᐅᓗᑎᓪᓗ ᐃᓄᐃᑦ ᐃᓕᖅᑯᓯᖓᓂᒃ ᑲᓇᑕᒥ. ᔨᐊᓯᑲ ᐃᑲᔫᑎᖃᕈᒪᓂᐊᖅᑐᖅ ᔭᒐᔾᔭᐃᕐᓯᓂᕐᒥᒃ ᐱᖁᑎᓂᒃ ᓯᕗᓂᑦᑎᓐᓂ ᐊᑐᕋᑦᓴᐅᖁᓪᓗᒋᑦ ᑭᖑᕚᑦᑎᓐᓄᑦ ᒪᒃᑯᓂᕐᓴᓄᑦ ᐅᐱᒍᓲᑎᒃᓴᐅᖁᓪᓗᒋᑦ ᐃᓕᖅᑯᓯᕐᒥᖕᓂᒃ ᐊᒻᒪᓗ ᓄᓇᒥᖕᓂᒃ. ᐅᐱᒋᒻᒥᔭᖓ ᑲᒪᒍᓐᓇᖅᑎᑕᐅᓂᕐᒥᓂᒃ ᐱᖁᑎᑐᖃᒥᓂᕐᓂᒃ ᓄᐊᑦᓯᓂᕐᒥᒃ, ᐃᓕᒃᑲᓐᓂᕈᑎᒋᓂᐊᕋᒥᒋᑦ ᐃᓄᐃᑦ ᓴᓇᕐᕈᑎᖏᓐᓂᒃ ᐃᓕᖅᑯᓯᖓᓂᓪᓗ.

2010-2011 – ᓯᑯ ᐋᓗᓗ (ᕕᒃᑐᕆᐊ ᐃᓕᓐᓂᐊᕕᒡᔪᐊᖓ)

ᓯᑯ ᐋᓗᓗ ᐃᓄᒃ ᐃᓕᓐᓂᐊᖅᑎ ᕕᒃᑐᕆᐊ ᐃᓕᓐᓂᐊᕕᒡᔪᐊᖓᓂ, ᒫᓐᓇ ᐱᐊᓂᒃᐸᓪᓕᐊᔪᖅ ᐃᓕᓴᕆᔭᐅᔾᔪᑎᒻᒪᕆᑦᑖᐸᓪᓕᐊᓂᕐᒥᒃ ᐃᓕᖅᑯᓯᓕᕆᓂᕐᒥᒃ ᐊᒻᒪᓗ ᓄᓇᖃᖅᑳᕐᓯᒪᔪᓂᒃ ᐃᓕᓐᓂᐊᓂᕐᒥᒃ. ᐃᓕᓐᓂᐊᖅᑕᖓ ᑐᕌᖓᔪᖅ ᐃᓚᒌᓐᓂᖏᓐᓂᒃ ᓄᓇᖃᖅᑳᕐᓯᒪᔪᑦ ᐃᓄᖏᑦ ᐊᒻᒪᓗ ᑲᓇᑕ, ᑭᓯᐊᓂ ᓯᑯ ᑐᕌᖓᑎᑦᓯᓗᐊᖅᑐᖅ ᐃᓕᓐᓂᐊᖅᑕᒥᓂᒃ ᐅᑭᐅᖅᑕᖅᑐᒧᑦ. ᓯᑯ ᑕᐃᒪᓐᖓᓕᒫᖅ ᐃᓕᓐᓂᐊᑲᓐᓂᕈᒪᖃᑦᑕᕐᓯᒪᓂᕐᒥᓂᒃ ᑲᔪᓯᑎᑦᓯᔪᖅ ᐃᓕᖅᑯᓯᕐᒥᓂᒃ ᐃᓄᐃᑦ ᐃᓕᖅᑯᓯᖓᓂᒃ, ᐃᓅᖃᑎᖏᑕ ᐃᓚᖃᕐᓂᖏᓐᓂᒃ ᑲᓇᑕᒥᒃ, ᓂᕆᐅᒃᑐᖅ ᖃᐅᔨᓂᐊᕐᓂᕐᒥᒃ ᓴᕐᖓᑎᑦᓯᑲᓐᓂᕈᑎᒃᓴᒥᒃ ᐅᑭᐅᖅᑕᖅᑑᑉ ᓄᓇᓕᖏᓐᓂᒃ.

2009-2010 – ᐹᒻ ᒍᕉᔅ (ᑲᕈᑕᓐ ᐃᓕᓐᓂᐊᕕᒡᔪᐊᖓ)

ᐹᒻ ᒫᓐᓇ ᐃᓕᓐᓂᐊᖅᑐᖅ ᑲᕈᑕᓐ ᐃᓕᓐᓂᐊᕕᒡᔪᐊᖓᓂ ᐋᑐᕚᒥ, ᐋᓐᑎᕆᐅ, ᐅᐱᒋᔭᐅᓂᕐᒧᑦ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᖅᑐᖅ ᑕᑯᑦᓴᐅᑎᑦᓯᓂᕐᒥᒃ ᐃᓕᖅᑯᓯᕐᒥᒃ ᓴᓐᖐᓂᕐᓴᐅᔪᒃᑯᑦ ᓄᓇᖃᖅᑳᕐᓯᒪᔪᓂᒃ ᐃᓕᓐᓂᐊᓂᕐᒥᒃ. ᐹᓐ ᑐᓂᓯᒪᓂᓕᒃ ᐃᓕᓐᓂᐊᓂᕐᒥᓂᒃ ᐃᖕᒥᓄᑐᐃᓐᓇᐅᖏᑦᑐᖅ, ᑭᓯᐊᓂᓕᑦᑕᐅᖅ ᐊᔪᕈᓐᓃᖅᑕᒥᓂᒃ ᖃᐅᔨᔭᒥᓂᓪᓗ ᒥᓇᕈᒪᒧᑦ ᐊᖏᕐᕋᒥᓄᑦ ᓄᓇᕗᒻᒥᐅᓄᑦ, ᐱᕚᓪᓕᑎᑦᓯᒍᑎᒃᓴᑲᓐᓂᕐᒥᒃ ᐃᓄᐃᑦ ᐱᖅᑯᓯᒥᓂᖏᓐᓂᒃ ᐊᒻᒪᓗ ᑭᓇᐅᓂᖏᓐᓂᒃ.