ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᖃᐅᔨᒪᔪᑦ ᐱᖕᒪᕆᐅᓂᖓᓂᒃ ᐃᓕᓐᓂᐊᕐᓂᖅ ᐊᒻᒪᓗ ᑲᒪᒋᓗᒍ ᐃᓕᓐᓂᐊᖃᑦᑕᕐᓂᖅ ᑲᔪᖏᖅᓴᐅᑕᐅᓂᖓᓂᒃ ᐃᓅᓱᑦᑐᓄᑦ ᐃᖅᑲᓇᐃᔮᕆᔪᒫᖅᑕᒥᓂᒃ ᐱᓇᓱᐊᕐᓂᕐᒧᑦ ᐃᓕᖅᑯᓯᑐᖃᓕᕆᓂᕐᒧᑦ. ᐃᑦᑕᕐᓂᓴᓕᕆᓂᖅ ᐊᐅᓚᓂᕆᔭᑦᑎᓐᓄᑦ ᑐᕌᒐᕆᔭᐅᓪᓗᐊᑕᕐᓂᖓᓄᑦ, ᓇᓗᓇᐃᖅᓯᓯᒪᕗᒍᑦ ᐱᕝᕕᖃᖅᑎᑦᓯᓂᕐᒥᒃ ᐊᕐᕌᒍᑕᒫᖅ ᐊᐅᔭᒃᑯᑦ ᓄᓇᒥ ᐃᓕᓐᓂᐊᑎᑦᓯᖃᑦᑕᕐᓂᕐᒥᒃ ᓄᑭᒋᓗᒍ ᐃᓕᓐᓂᐊᑲᓐᓂᕈᑎᒃᓴᐅᔪᓐᓇᖅᑐᓂᒃ ᑐᑭᓯᑎᑦᓯᒋᐊᕈᑎᒋᔭᐅᓪᓗᓂ.

2002-ᒥᓂᒃ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᐋᖅᑭᑦᓱᐃᖃᑦᑕᖅᓯᒪᕗᑦ ᐊᒻᒪᓗ ᐊᐅᓚᑦᓯᖃᑦᑕᖅᓯᒪᓪᓗᑎᒃ ᑕᒪᒃᑯᓂᖓ ᓄᓇᓂ ᐃᓕᓐᓂᐊᕐᕕᒋᔭᐅᔪᓐᓇᖅᑐᓂᒃ ᐃᓄᐃᑦ ᐃᓅᓱᑦᑐᖏᓐᓄᑦ. ᐊᕐᕌᒍᕆᖅᑲᐅᔭᑦᑎᓐᓂ ᑕᑯᔾᔪᑕᐅᓚᐅᖅᑐᖅ ᖁᕕᐊᓇᖅᑐᒥᒃ ᓄᑖᒥᒃ ᐱᒋᐊᕈᑕᐅᔪᓐᓇᖅᑐᒥᒃ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ ᐊᒻᒪᓗ ᓄᓇᕗᑦ ᒐᕙᒪᖓᑕ ᐃᓕᖅᑯᓯᓕᕆᔨᒃᑯᖏᑦ, ᐅᖃᐅᓯᓕᕆᔨᒃᑯᑦ, ᐃᓐᓇᐃᑦ ᐊᒻᒪᓗ ᒪᒃᑯᑦᑐᑦ ᑲᑐᔾᔨᖃᑎᒌᑦᑐᑎᒃ ᒪᓂᒪᑎᑦᓯᓂᕐᒥᒃ 2006-ᒥ ᓄᓇᒥ ᐃᓕᓐᓂᐊᑎᑦᓯᓂᕐᒥᒃ.

2009 - ᖃᐅᔨᓴᕐᓂᐅᔪᒧᑦ ᐊᕐᕌᒍᖓ

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᐊᒻᒪᓗ ᓄᓇᕗᑦ ᒐᕙᒪᖓᑕ-ᐃᓕᖅᑯᓯᓕᕆᔨᒃᑯᖏᑦ ᐊᐅᔭᖅ ᓄᖅᑲᖓᓚᐅᐱᓪᓚᓂᐊᖅᑐᑦ ᖃᐅᔨᓇᓱᐊᑦᓯᐊᕐᓂᐊᕋᒥᒃ ᐱᓕᕆᐊᖑᔪᓂᒃ ᑐᕌᒐᕆᔭᑦᑎᓐᓄᑦ ᐊᓯᖅᑯᐃᓕᓐᖏᒃᑲᓗᐊᕐᒪᖔᑦᑕ ᐊᒻᒪᓗ ᖃᐅᔨᓇᓱᐊᕐᓗᑕ ᐱᐅᓂᖅᐹᒃᑯᑦ ᐊᑐᖅᑕᐅᖃᑦᑕᕈᓐᓇᓂᐊᖅᑐᒥᒃ ᐋᖅᑭᑦᓯᒪᓂᐅᔪᒥᒃ ᑎᒍᓯᕙᓪᓕᐊᒍᑎᒃᓴᒥᒃ ᐃᑦᑕᕐᓂᓴᓕᕆᓂᕐᒥᒃ ᐃᓕᓐᓂᐊᑎᑦᓯᓂᕐᒥᒃ ᓄᓇᕗᒻᒥ.
 

2006, 2007, 2008 - ᓴᓂᕋᔭᒃ, ᕙᑕᒪᓂᐅᒃ ᓄᓇᖓ

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᐊᒻᒪᓗ ᓄᓇᕗᑦ ᒐᕙᒪᖓ (ᐃᓕᖅᑯᓯᓕᕆᔨᒃᑯᑦ, ᐅᖃᐅᓯᓕᕆᔨᒃᑯᑦ, ᐃᓐᓇᐃᑦ ᐊᒻᒪᓗ ᒪᒃᑯᑦᑐᑦ) ᑲᑐᔾᔨᖃᑎᒌᓐᓂᖃᓚᐅᖅᑐᑦ ᒪᑐᐃᓐᖓᑎᑦᓯᓂᕐᒥᒍᑦ ᒪᓂᒪᑎᑦᓯᒍᑎᒥᒃ ᓄᓇᒥ ᐃᓕᓐᓂᐊᑎᑦᓯᓂᕐᒥᒃ ᑲᑐᔾᔨᖃᑎᒌᒍᑕᐅᓗᓂ. ᒫᓐᓇᐅᑎᓪᓗᒍ, ᐊᑕᐅᓯᑲᐃᓐᓇᕐᒥᒃ ᓄᓇᓕᒻᒥ ᒪᓂᒪᑎᑦᓯᕝᕕᖃᓚᐅᖅᑐᒍᑦ ᐊᐅᓚᓂᖃᐃᓐᓇᓂᐊᖅᑐᒥᒃ ᓄᓇᒥ ᐃᓕᓐᓂᐊᑎᑦᓯᓂᕐᒥᒃ ᐃᓕᓐᓂᐊᖅᑏᑦ ᐃᑦᑕᕐᓂᓴᓕᕆᓂᐅᔪᒧᑦ ᐃᑲᔪᖅᑎᒋᔭᐅᑐᐃᓐᓇᑎᓪᓗᒋᑦ. ᐃᑲᔪᖅᑎᒋᔭᐅᑎᓪᓗᒋᑦ ᔫᓕ ᕌᔅᒧᑦ, ᓄᓇᕗᒻᒥ ᐃᑦᑕᕐᓂᓴᓕᕆᔨᖓᓂᒃ ᑐᑭᓯᓇᓱᐊᕐᓂᕐᒧᑦ ᐊᒻᒪᓗ ᑭᒡᒍᑎᒃᓴᕆᔭᐅᓇᔭᖅᑐᓂᒃ ᐊᐱᖅᑯᑎᒋᓚᐅᖅᑕᖏᓐᓄᑦ ᓴᓂᕋᔭᒻᒥ ᑑᓕᖃᕐᕕᒥᓂᕐᓄᑦ, ᐃᓕᓐᓂᐊᖃᑦᑕᓚᐅᕐᒥᔪᑦ ᐊᔪᓐᖏᓐᓂᕆᔭᐅᔪᓂᒃ ᐊᒥᓱᓂᒃ. ᐱᓇᓱᐊᕈᓯᕐᒥ ᐊᕐᕕᓂᓕᓐᓂᒃ ᐅᑉᓗᓂᒃ, ᐃᓕᓐᓂᐊᖅᑏᑦ ᐃᑦᑕᕐᓂᓴᕐᓂᐊᕐᕕᒋᓂᐊᖅᑕᖓᓅᕈᔾᔭᐅᖃᑦᑕᓚᐅᖅᑐᑦ ᐊᓱᐃᓛᒃ ᐱᓱᖃᑦᑕᕆᐊᖃᓚᐅᖅᑐᑦ ᓯᕕᑭᑦᑐᑯᓗᒻᒥᒃ ᑲᒪᕝᕕᒋᓂᐊᖅᑕᖓᓄᑦ ᐱᓕᕆᕝᕕᒋᔭᖓᓄᑦ ᐸᕝᕕᓴᑦᑕᐃᓕᓪᓗᑎᒃ ᓈᓚᕝᕕᒥᓂᕐᒥᒃ ᓴᓗᒻᒪᖅᓴᐃᔪᓂᒃ. ᐅᓪᓗᒃᑯᑦ ᓴᒡᒐᖃᑦᑕᓚᐅᖅᑐᑦ ᓇᓗᓇᐃᖅᑕᐅᓯᒪᔪᓂ ᑕᒫᓂ ᓄᓇᖓᓂ ᓄᓇᑐᔪᒻᒪᕆᐊᓗᒻᒥ, ᖃᕆᓴᐅᔭᒨᖅᑐᑎᒍᑦ ᓇᓗᓇᐃᖅᑐᐃᖃᑦᑕᖅᓱᑎᒃ ᓄᓇᓐᖑᐊᒨᖅᑲᐃᓪᓗᑎᒃ ᐊᒻᒪᓗ ᐃᑦᑕᕐᓂᓴᓕᕆᓂᕐᒧᑦ ᖃᓄᐃᓕᖓᓂᖓᓂᒃ ᑎᑎᕋᖅᑐᑎᒃ ᓴᖅᑭᐅᒪᖁᓪᓗᒋᑦ ᖃᕆᓴᐅᔭᒨᖅᑐᒥ ᓄᓇᓐᖑᐊᓕᐊᕆᔭᒥᓂ, ᐊᔾᔨᓕᐅᕆᖃᑦᑕᖅᓱᑎᒃ ᐅᔭᕋᕈᕐᓂᑯᓂᒃ ᓇᑭᓐᖔᖅᓯᒪᓂᖏᓐᓂᒃ ᖃᓄᐃᑦᑑᓂᖏᓐᓂᒃ ᑭᓱᒥᓂᐅᓂᖏᓐᓂᒃ ᓱᖅᑯᐃᖅᓯᓇᓱᐊᖅᑐᑎᒃ, ᐱᑐᖃᖁᑎᒥᓂᕐᓂᒃ ᐃᑦᑕᕐᓂᓴᓂᒃ ᐊᒻᒪᓗ ᖃᓄᐃᓕᖓᓂᖏᓐᓂᒃ ᐊᒻᒪᓗᑦᑕᐅᖅ ᐃᑲᔪᖃᑦᑕᖅᑐᑎᒃ ᐋᖅᑭᐅᒪᑦᓯᓂᕐᒥᒃ ᑲᒪᑦᓯᐊᕆᐊᖃᕐᓂᕐᒥᒃ ᐅᓪᓗᒃᑯᑦ ᑕᒻᒫᖅᓯᒪᕕᒋᔭᒥᓂ (ᐊᓂᑦᓯᖃᑦᑕᕐᓂᖅ ᖁᕐᕕᖕᒥᒃ, ᐃᒥᖅᑕᕐᓂᖅ, ᓂᖅᑎᐅᖃᑕᐅᓂᖅ, ᐊᓯᖏᓪᓗ...). ᐊᒻᒪᓗᑦᑕᐅᖅ, ᐅᓪᓗᖅ ᐊᓂᒍᖅᐸᓪᓕᐊᓂᖓᓂ ᓇᖕᒥᓂᖅ ᐃᖕᒥᓐᓂᒃ ᓇᓗᓇᐃᖅᓯᒋᐊᖃᖃᑦᑕᓚᐅᖅᑐᑦ ᖃᓄᐃᓕᐅᖅᑲᐅᓂᕐᒥᓂᒃ ᐱᓕᕆᐊᕆᖅᑲᐅᔭᒥᓂᒃ ᐅᓪᓘᖅᑲᐅᔪᒥ ᑎᑎᕋᕆᐊᖃᖃᑦᑕᓚᐅᖅᑐᑦ ᖃᐅᑕᒫᖅᓯᐅᑎᒥᓐᓂ ᐅᓂᒃᑳᕆᓗᑎᒃ. ᖁᕕᐊᓇᓚᐅᕐᒥᔪᖅ ᓯᓚᑦᓯᐊᖑᒐᔪᓐᓂᖅᓴᐅᓚᐅᕐᖓᑦ ᐊᕐᕌᓂᓂ ᐊᒻᒪᓗ ᓯᓚᕐᓂᓪᓗᓚᐅᖅᓯᒪᒐᓂ ᓄᓇᓕᓐᓅᕆᐊᖃᕈᑎᒋᓗᑎᒍᑦ ᑲᒪᕕᒋᖃᑦᑕᑕᑦᑎᓐᓅᓐᖏᒋᐊᖃᓚᐅᓐᖏᑦᑐᑎᒍᑦ. ᐃᓕᓐᓂᐊᕈᓐᓇᑦᓯᐊᓚᐅᖅᑐᑦ ᑲᒪᒋᔭᐅᖃᑦᑕᕆᐊᖃᓲᓂᒃ ᐃᑦᑕᕐᓂᓴᓕᕆᓂᕐᒥᒃ, ᓴᓗᒻᒪᖅᓴᐃᓂᖅ ᐃᑦᑕᕐᓂᓴᓂᒃ/ᐱᖁᑎᑐᖃᒥᓂᕐᓂᒃ, ᑐᑭᓯᕙᓪᓕᖅᑐᑎᒃ ᓂᕐᔪᑎᒥᓂᕐᓂᒃ ᐃᑦᑕᕐᓂᓴᖃᕐᕕᐅᔪᓂ ᓄᓇᓂ, ᐊᖑᑕᐅᓂᖏᑦ ᐊᕐᓇᐅᓂᖏᑦ ᐊᒻᒪᓗ ᐃᑦᑕᕐᓂᓴᓕᕆᓂᖅ ᐊᒻᒪᓗ ᐅᑭᐅᖅᑕᖅᑐᒥ ᐃᑦᑕᕐᓂᓴᓕᕆᓂᕐᒥᒃ ᐱᓗᐊᖅᑐᒥ. ᑲᒪᔭᕆᐊᖃᖃᑦᑕᓚᐅᕐᒥᔪᑦ ᐋᖅᑭᑦᓱᐃᓗᑎᒃ ᐊᑐᐃᓐᓇᕈᖅᓴᐃᓗᑎᒃ ᑕᑯᔭᒐᑦᓴᐅᔪᓂᒃ ᐱᓕᕆᐊᒥᓂᒃ ᐱᐊᓂᒃᑲᒥᒃ ᓴᖅᑭᔮᖅᑎᒐᑦᓴᒥᓂᒃ ᓴᓂᕋᔭᒻᒥᐅᓄᑦ. ᑕᒪᓐᓇᓕᒫᑦᓯᐊᖅ ᑲᒪᒋᔭᐅᑎᓪᓗᒍ ᖃᐅᔨᒪᔨᑕᐅᖏᓐᓇᕆᐊᖃᓚᐅᖅᑐᑦ ᑭᒡᒐᖅᑐᐃᔨᐅᓗᑎᒃ ᑐᑭᓯᑎᑦᓯᔨᒋᔭᐅᓗᑎᒃ ᓄᓇᒥᓐᓂ ᐊᒻᒪᓗ ᑲᒪᑦᓯᐊᕐᓗᑎᒃ ᓴᓂᕋᔭᒻᒥᐅᑦ ᖃᓄᐃᓕᐅᕐᓂᐅᖁᔭᖏᓐᓂᒃ.
 

2005 - ᒥᑦᑎᒪᑕᓕᒃ, ᕿᓚᓗᒃᑲᓐ ᓄᓇᖓ

ᐃᓕᓐᓂᐊᕐᓂᖏᓐᓂ ᓄᓇᒥ, ᐊᑐᓂᑦ ᐃᓕᓐᓂᐊᖅᑏᑦ ᐃᑦᑕᕐᓂᓴᓕᕆᓂᕐᒧᑦ ᐃᑲᔪᖅᑎᐅᑎᑕᐅᖃᑦᑕᖅᑐᑦ. ᐃᑲᔪᕐᓂᖏᓐᓂᒃ ᓂᐅᖁᕆᔭᐅᔪᒥᒃ ᐊᒻᒪᓗ ᐃᑦᑕᕐᓂᓴᓕᕆᔨᐅᑉ ᐃᑲᔪᖅᑎᖓᓂᒃ ᑭᐅᒍᑎᒃᓴᓂᒐᓱᐊᕐᓂᖓᓂ ᐃᓚᖏᓐᓂᒃ ᐊᐱᖅᑯᑕᐅᔪᓂᒃ ᕿᓚᓗᒃᑲᑦ ᓄᓇᖓᑕ ᒥᑦᓵᓄᑦ ᐃᓕᑉᐸᓪᓕᐊᓚᐅᕐᒥᔪᑦ ᐅᓄᖅᑐᓂᒃ ᓄᑖᓂᒃ ᐊᔪᓐᖏᓐᓂᕆᔭᐅᔪᓂᒃ. ᖃᐅᑕᒫᑦ ᐱᓇᓱᐊᕈᓯᐅᑉ ᐃᓗᐊᓂ ᐃᓕᓐᓂᐊᖅᑏᑦ ᐱᓕᕆᕕᒋᔭᐅᔪᒨᕈᔾᔭᐅᓪᓗᑎᒃ ᓄᓇᒧᑦ ᐊᒻᒪᓗ ᓯᕕᑭᑦᑑᒐᓗᐊᒥᒃ ᐱᓱᒋᐊᖃᖃᑦᑕᓚᐅᖅᑐᑦ ᐱᓕᕆᕕᒋᕙᑦᑕᒥᓐᓄᑦ ᐊᖅᑯᑎᖏᑦ ᒪᕐᕋᐅᓗᐊᕐᓂᖏᓐᓄᑦ ᓄᓇᓯᐅᑎᒧᑦ ᐅᓯᑲᑦᑕᐅᒻᒧᑦ. ᐅᓪᓗᒃᑯᑦ ᓴᒡᒐᖃᑦᑕᓚᐅᖅᑐᑦ ᓇᓗᓇᐃᖅᑕᐅᓯᒪᔪᓂ ᑕᒫᓂ ᓄᓇᖓᓂ ᓄᓇᑐᔪᒻᒪᕆᐊᓗᒻᒥ, ᖃᕆᓴᐅᔭᒨᖅᑐᑎᒍᑦ ᓇᓗᓇᐃᖅᑐᐃᖃᑦᑕᖅᓱᑎᒃ ᓄᓇᓐᖑᐊᒨᖅᑲᐃᓪᓗᑎᒃ ᐊᒻᒪᓗ ᐃᑦᑕᕐᓂᓴᓕᕆᓂᕐᒧᑦ ᖃᓄᐃᓕᖓᓂᖓᓂᒃ ᑎᑎᕋᖅᑐᑎᒃ ᓴᖅᑭᐅᒪᖁᓪᓗᒋᑦ ᖃᕆᓴᐅᔭᒨᖅᑐᒥ ᓄᓇᓐᖑᐊᓕᐊᕆᔭᒥᓂ, ᐊᔾᔨᓕᐅᕆᖃᑦᑕᖅᓱᑎᒃ ᐅᔭᕋᕈᕐᓂᑯᓂᒃ ᓇᑭᓐᖔᖅᓯᒪᓂᖏᓐᓂᒃ ᖃᓄᐃᑦᑑᓂᖏᓐᓂᒃ ᑭᓱᒥᓂᐅᓂᖏᓐᓂᒃ ᓱᖅᑯᐃᖅᓯᓇᓱᐊᖅᑐᑎᒃ, ᐱᑐᖃᖁᑎᒥᓂᕐᓂᒃ ᐃᑦᑕᕐᓂᓴᓂᒃ ᐊᒻᒪᓗ ᖃᓄᐃᓕᖓᓂᖏᓐᓂᒃ ᐊᒻᒪᓗᑦᑕᐅᖅ ᐃᑲᔪᖃᑦᑕᖅᑐᑎᒃ ᐋᖅᑭᐅᒪᑦᓯᓂᕐᒥᒃ ᑲᒪᑦᓯᐊᕆᐊᖃᕐᓂᕐᒥᒃ ᐅᓪᓗᒃᑯᑦ ᑕᒻᒫᖅᓯᒪᕕᒋᔭᒥᓂ (ᐊᓂᑦᓯᖃᑦᑕᕐᓂᖅ ᖁᕐᕕᖕᒥᒃ, ᐃᒥᖅᑕᕐᓂᖅ, ᓂᖅᑎᐅᖃᑕᐅᓂᖅ, ᐊᓯᖏᓪᓗ...). ᐊᒻᒪᓗᑦᑕᐅᖅ, ᐅᓪᓗᖅ ᐊᓂᒍᖅᐸᓪᓕᐊᓂᖓᓂ ᓇᖕᒥᓂᖅ ᐃᖕᒥᓐᓂᒃ ᓇᓗᓇᐃᖅᓯᒋᐊᖃᖃᑦᑕᓚᐅᖅᑐᑦ ᖃᓄᐃᓕᐅᖅᑲᐅᓂᕐᒥᓂᒃ ᐱᓕᕆᐊᕆᖅᑲᐅᔭᒥᓂᒃ ᐅᓪᓘᖅᑲᐅᔪᒥ ᑎᑎᕋᕆᐊᖃᖃᑦᑕᓚᐅᖅᑐᑦ ᖃᐅᑕᒫᖅᓯᐅᑎᒥᓐᓂ ᐅᓂᒃᑳᕆᓗᑎᒃ. ᓯᓚᕐᓂᓪᓗᓕᕌᖓ ᒪᖁᑦᑐᓂ ᓄᓇᓕᒻᒦᒋᐊᖃᖃᑦᑕᓚᐅᖅᑐᑦ ᐊᒻᒪᓗ ᐃᓕᓐᓂᐊᕈᓐᓇᑦᓯᐊᖃᑦᑕᓚᐅᖅᑐᑦ ᐊᓯᖏᓐᓂᒃ ᑲᒪᒋᔭᐅᖃᑦᑕᕆᐊᖃᓲᓂᒃ ᐃᑦᑕᕐᓂᓴᓕᕆᓂᕐᒧᑦ, ᓴᓗᒻᒪᖅᓴᐃᓂᖅ ᐃᑦᑕᕐᓂᓴᓂᒃ/ᐱᖁᑎᑐᖃᒥᓂᕐᓂᒃ ᐊᒻᒪᓗ ᐃᓕᓐᓂᐊᐸᑦᓱᑎᒃ ᐅᑭᐅᖅᑕᖅᑐᒥ ᐃᑦᑕᕐᓂᓴᓕᕆᓂᕐᒨᖓᓪᓗᐊᑕᖅᑐᓂᒃ. ᑲᒪᔭᕆᐊᖃᖃᑦᑕᓚᐅᕐᒥᔪᑦ ᐋᖅᑭᑦᓱᐃᓗᑎᒃ ᐊᑐᐃᓐᓇᕈᖅᓴᐃᓗᑎᒃ ᑕᑯᔭᒐᑦᓴᐅᔪᓂᒃ ᐱᓕᕆᐊᒥᓂᒃ ᐱᐊᓂᒃᑲᒥᒃ ᓴᖅᑭᔮᖅᑎᒐᑦᓴᒥᓂᒃ ᒥᑦᑎᒪᑕᓕᒻᒥᐅᓄᑦ. ᑕᒪᓐᓇᓕᒫᑦᓯᐊᖅ ᑲᒪᒋᔭᐅᑎᓪᓗᒍ ᖃᐅᔨᒪᔨᑕᐅᖏᓐᓇᕆᐊᖃᓚᐅᖅᑐᑦ ᑭᒡᒐᖅᑐᐃᔨᐅᓗᑎᒃ ᑐᑭᓯᑎᑦᓯᔨᒋᔭᐅᓗᑎᒃ ᓄᓇᒥᓐᓂ ᐊᒻᒪᓗ ᑲᒪᑦᓯᐊᕐᓗᑎᒃ ᒥᑦᑎᒪᑕᓕᒻᒥᐅᑦ ᖃᓄᐃᓕᐅᕐᓂᐅᖁᔭᖏᓐᓂᒃ.
 

2004 - ᓇᐅᔮᑦ / ᕇᐴᔅ ᕙᐃ, ᓇᐅᔮᖏᓐᓂ

2004-ᒥ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᑲᑐᔾᔨᖃᑎᖃᖅᑐᑎᒃ ᑖᒃᑕ ᓲ ᕋᐅᓕᒥᒃ ᐊᒻᒪᓗ ᐃᓕᓐᓂᐊᕕᔾᔪᐊᖓᓂ ᕗᑎᔅ ᑲᓚᒻᕕᐊ ᖃᐅᔨᒃᑲᓐᓂᕈᒪᓪᓗᑎᒃ ᓇᐅᔮᑦ ᓄᓇᖓᓂᒃ. ᐃᓚᖓ ᓴᒡᒐᖅᑕᐅᖃᑦᑕᖅᓯᒪᔪᖅ ᒫᑎᐊᓴᓐᒧᑦ ᐃᓚᒋᓪᓗᓂᐅᒃ ᑕᓪᓕᒪᒋᓕᖅᑕᖓᓂ ᑑᓖᑦ ᑕᑯᑦᓴᐅᑎᑕᐅᓂᕆᓚᐊᖅᑕᖏᓐᓂᒃ 1920 ᐱᒋᐊᓕᓵᕐᓂᖏᓐᓂ. ᐃᓕᓐᓂᐊᖅᑏᑦ ᐃᓕᓐᓂᐊᕈᑎᖃᓚᐅᖅᑐᑦ ᐊᔾᔨᒌᓐᖏᑦᑐᓂᒃ ᐃᑦᑕᕐᓂᓴᓕᕆᓂᕐᒨᖓᔪᓂᒃ ᐊᔪᓐᖏᔾᔪᑎᒃᓴᕆᓇᔭᖅᑕᖏᓐᓂᒃ ᑎᒍᓯᕙᓪᓕᐊᓇᓱᐊᕐᓂᕐᒥᒃ ᐃᖅᑲᓇᐃᔮᒥ ᐃᑦᑕᕐᓂᓴᓕᕆᓂᕐᒨᖓᔪᓂᒃ ᐃᑲᔪᖅᑎᐅᓂᕐᒧᑦ ᐃᑦᑕᕐᓂᓴᓕᕆᔨᓄᑦ. ᐅᑭᐅᕋᓵᓗᓐᓂᒃ ᑕᒪᓐᓇ ᐃᓕᓐᓂᐊᑲᓐᓂᕐᓂᖅ ᐱᓇᓱᐊᑯᑕᐅᔭᓚᐅᕐᓗᒍ ᑭᓯᐊᓂ ᓇᓗᓇᐃᒃᑯᑕᖅᑖᕈᑕᐅᑕᐃᓐᓇᓲᖑᒻᒪᑦ ᐃᑦᑕᕐᓂᓴᓕᕆᔨᒃᓴᐅᓂᕐᒧᑦ, ᓴᖅᑭᐅᒪᓂᕆᔭᖏᑦ ᐊᒻᒪᓗ ᐊᑐᐃᓐᓇᐅᑎᑦᓰᓇᕐᓂᖏᑦ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᐊᖑᔪᓂ ᐊᔪᓐᖏᔾᔪᑎᑖᕈᑎᒋᕙᓪᓕᐊᖃᓯᐅᑎᓯᓐᓈᓂᐊᖅᑕᖓ ᓄᓇᒥᓐᓂ ᖃᐅᔨᒪᔪᕐᔪᐊᖑᓂᕐᒧᑦ ᓇᖕᒥᓂᖅ ᓄᓇᒥᓐᓃᓪᓗᑎᒃ ᐃᑦᑕᕐᓂᓴᓕᕆᓂᖅ ᐊᒻᒪᓗ ᐱᖅᑯᓯᑐᖃᕆᔭᐅᓯᒪᔪᓂᒃ. ᐃᓕᓐᓂᐊᓚᐅᖅᑐᑦ ᐃᑦᑕᕐᓂᓴᓕᕆᓂᕐᒧᑦ ᐃᖅᑲᓇᐃᔮᖃᕐᓂᕐᒥᒃ, ᓇᓗᓇᐃᖅᑕᐅᓯᒪᒍᑎᒋᔭᖏᓐᓂᒃ ᐊᒻᒪᓗ ᐋᖅᑭᑦᓯᒪᒍᑎᖏᓐᓂᒃ ᑲᒪᒋᔭᐅᖃᑦᑕᕆᐊᖃᖅᓯᒪᓂᖏᓐᓄᑦ, ᐊᐅᓚᔪᓐᓇᑦᓯᐊᕆᐊᖃᕐᓂᖅ ᐃᖃᓐᖏᓯᐊᕐᓗᓂ ᑎᒥᒃᑯᑦ ᐊᐅᓚᑦᓯᓂᕐᒥᒃ, ᐋᖅᑭᐅᒪᒍᑕᐅᔪᑦ ᐊᐅᓚᑦᓯᔾᔪᑎᒃᓴᓂᒃ ᖃᐅᔨᓴᕐᓂᕐᒥᒃ ᐊᒻᒪᓗ ᖃᓄᖅ ᐃᑉᐱᒋᔭᐅᑦᓯᐊᕆᐊᖃᕐᓂᖓᓂᒃ ᐱᖅᑯᓯᑐᖃᓕᕆᓂᕐᒨᖓᔪᑦ ᐊᐅᓚᑕᐅᓂᖏᑎᒍᑦ ᐃᑦᑕᕐᓂᓴᓕᕆᓂᕐᒧᑦ ᖃᐅᔨᓇᓱᐊᖅᑕᐅᔪᑦ/ᓴᒡᒐᖅᑕᐅᔪᑦ ᓂᐱᖃᕈᑎᒋᓗᒋᑦ.

2003 - ᖁᕐᓗᖅᑐᖅ, ᓇᐹᖅᑐᖃᕐᓂᖓᓂ ᑰᒑᓗᒃ

ᐊᐅᔭᖓᓂ 2003, ᖃᑦᓰᓐᓇᐅᓪᓗᑎᒃ ᐃᓕᓐᓂᐊᖅᑏᑦ ᐊᒻᒪᓗ ᐃᓚᒋᔭᖏᑦ ᐱᖃᑕᐅᓚᐅᖅᑐᑦ ᓇᓗᓇᐃᖅᑕᐅᓯᒪᓐᖏᑦᑑᒐᓗᐊᒥᒃ ᖃᐅᔨᓴᕐᓂᕐᒥᒃ ᓄᓇᒥᒃ ᓇᐹᖅᑐᖃᕐᓂᖓᓂ ᑰᒑᓘᑉ, ᐅᖓᓯᓗᐊᓐᖏᑦᑐᖅ ᖁᕐᓗᖅᑐᕐᒥᒃ. ᐅᓄᖅᑐᑦ ᖁᕐᓗᖅᑐᕐᒥᐅᑦ ᐃᓐᓇᖏᑦ ᐱᕈᖅᓴᓚᐅᕐᒪᑕ ᑕᒫᓂ ᓄᓇᒥ ᐊᒻᒪᓗ ᖃᐅᔨᒪᔭᐅᔪᓂ ᓄᓇᓂ ᐃᑦᑕᕐᓂᓴᖅᑕᓕᕐᔪᐊᒻᒪᕆᐊᓗᓐᓂ. ᐃᓚᖓᑦ ᑐᕌᖓᑎᑕᐅᓪᓗᓂ ᖃᐅᔨᓴᕐᓂᖅ ᓇᓗᓇᐃᖅᓯᒪᒍᑎᒃᓴᒧᑦ ᐊᒻᒪᓗ ᑎᑎᖅᑲᓅᖅᑲᖅᑕᐅᔾᔪᑎᒃᓴᖏᓐᓂᒃ ᑖᒃᑯᐊ ᓄᓇᐃᑦ ᓴᐳᔾᔭᐅᓯᒪᒍᑎᒃᓴᖏᓐᓄᑦ.
 

2002 - ᖁᕐᓗᖅᑐᖅ, ᐃᑦᓯᕋᕐᔪᐃᑦ ᑐᑦᓯᐊᕐᕕᖓ

ᐃᑦᑕᕐᓂᓴᓕᕆᓂᕐᒥᒃ ᓄᓇᒥ ᐃᓕᓐᓂᐊᕐᓂᖅᑕᖃᓚᐅᖅᑐᖅ ᖁᕐᓗᖅᑐᒥ ᐊᐅᒡᒍᓯ 2002-ᒥ. 2002-ᒥ, ᓯᑕᒪᐅᔪᖅᑐᑦ ᓄᓇᕗᒻᒥ ᐃᓕᓐᓂᐊᖅᑏᑦ ᑲᑎᓯᓚᐅᖅᑐᑦ ᐃᑦᑕᕐᓂᓴᓕᕆᔨᒥᒃ ᑭᐊᓐ ᓱᐃᔨᒥᒃ ᓴᒡᒐᕆᐊᖅᑐᖅᓱᑎᒃ. ᑐᒃᓯᕋᐅᑎᓕᐅᕐᕕᒃᓴᐅᓚᐅᖅᑐᖅ ᐃᓕᓐᓂᐊᖃᑕᐅᔪᒪᔪᓄᑦ ᓄᓇᕗᒦᓐᖔᖅᑐᓂᒃ ᐊᒻᒪᓗ ᐃᓕᓐᓂᐊᖃᑕᐅᔪᓐᓇᓚᐅᖅᑐᑦ ᐱᖓᓱᓂᒃ ᐊᕕᑦᑐᖅᓯᒪᓂᖏᓐᓃᖔᖅᑐᑦ ᓄᓇᕗᒻᒥ (ᕿᑎᕐᒥᐅᑦ, ᑭᕙᓪᓕᖅ ᐊᒻᒪᓗ ᕿᑭᖅᑖᓗᒃ). ᐃᓕᓐᓂᐊᖅᑏᑦ ᐱᒋᐊᕈᑎᖃᓚᐅᖅᑐᑦ ᑐᑭᓯᑎᑕᐅᒋᐊᕈᑎᖃᖅᓱᑎᒃ ᐃᑦᑕᕐᓂᓴᖅᑕᓕᒻᒥᒃ ᓄᓇᒥᒃ ᖁᕐᓗᖅᑐᒥ ᐃᑦᓯᕋᕐᔪᐊᒃᑯᑦ ᑐᒃᓯᐊᕐᕕᖓᑕ ᓴᓂᐊᓂ. ᐱᑐᖃᖁᑎᒥᓃᑦ ᐃᑦᑕᕐᓂᓴᐃᑦ ᐃᓚᒋᔭᐅᓪᓗᑎᒃ ᑲᓐᓄᔭᓂᒃ ᓄᕗᓕᐅᖅᓯᒪᔪᑦ ᕿᔪᒻᒥᒃ ᐃᐳᓖᑦ ᐊᒻᒪᓗ ᐅᒥᒻᒪᒻᒧᑦ ᓇᔾᔪᒥᓂᕐᓂᒃ ᖃᓪᓗᑎᓕᐊᕆᓯᒪᔪᑦ ᓇᕝᕚᖅᑕᐅᖃᑦᑕᖅᓯᒪᓚᐅᖅᑐᑦ ᓯᕗᓂᐊᓂ ᑕᒫᓐᖓᑦ ᓄᓇᒥᒃ.