|
ᓴᖅᑭᑎᑕᐅᓯᒪᔪᑦ ᐱᔭᒃᓴᐃᑦ
ᐃᓐᓇᐃᑦ ᐃᓕᑕᕆᔭᐅᔾᔪᑎᖓᑦ
ᑖᓐᓇ ᐃᓐᓇᕐᓄᑦ ᐃᓕᑕᕆᔭᐅᔾᔪᑎᖓᑦ ᑐᓂᔭᐅᖃᑦᑕᖅᐳᖅ ᓄᓇᕗᒥ ᐃᓐᓇᕆᔭᐅᔪᓂᑦ ᐃᓕᑕᖅᓯᒍᓐᓇᖁᓪᓗᑕ ᑐᓂᓯᓯᒪᓂᖏᓐᓄᑦ ᐃᑲᔪᕐᓂᒃᑯᑦ ᓄᓇᕗᒥᐅᓂᒃ ᑐᑭᓯᓂᕐᒧᑦ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ, ᐱᖅᑯᓯᑐᖃᖏᓐᓂᒃ ᐊᒻᒪᓗ ᐃᑦᑕᕐᓂᓴᖁᑎᒋᔭᖏᓐᓂᒡᓗ. ᐊᒥᓱᐃᑦ ᐃᓐᓇᐃᑦ ᐃᖅᑲᓇᐃᔭᖅᓯᒪᔪᑦ ᐃᓕᓐᓂᐊᕐᕕᓂᒃ ᐃᓕᓐᓂᐊᖅᑎᑦᑎᓪᓗᑎᒃ ᐊᔪᙱᑕᒥᖕᓂᑦ ᓱᕈᓯᓄᑦ ᐊᒻᒪᓗ ᖃᐅᔨᒪᔭᑐᖃᖏᓐᓂᒃ. ᑖᒃᑯᐊ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᑦ ᕿᓂᓲᖑᕗᑦ ᐊᑐᓂᐅᔪᓂᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᓄᓇᓖᖕᒥᙶᖅᑐᒥᒃ ᑎᒃᑯᐊᖅᓯᖃᑦᑕᖅᐳᑦ ᐃᓐᓇᕐᒥᒃ (ᕿᑎᕐᒥᐅᓂ, ᑭᕙᓪᓕᕐᒥ ᐊᒻᒪᓗ ᕿᑭᖅᑕᓂ). ᑖᓐᓇ ᐃᓕᑕᕆᔭᐅᔾᔪᑦ ᑐᓂᔭᐅᓯᒪᓕᖅᑐᑦ ᐊᕐᕌᒎᓚᐅᖅᑐᓂᒃ 1999-ᒥ ᐊᒻᒪ 2001-ᒥ.
ᐃᓱᓕᕝᕕᒋᔭᐅᓚᐅᖅᑐᖅ ᑎᒃᑯᐊᖅᓯᓂᕐᒧᑦ 2003-ᒧᑦ ᒪᑐᓚᐅᖅᑐᖅ ᓯᑎᐱᕆ 30-ᒥ. ᑎᒃᑯᐊᖅᑕᐅᔪᑦ 2003-ᒧᑦ ᐃᓐᓇᕐᓂᒃ ᐃᓕᑕᖅᓯᓂᕐᒧᑦ ᐃᓕᑕᓕᕆᔾᔪᑎᑖᖅᑐᑦ ᓇᓗᓇᐃᖅᑕᐅᓛᖅᑐᑦ ᑐᓴᐅᑎᒃᑯᑦ ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐳᓛᕐᕕᒃᑯᑎᒍ.
1999-ᒥ ᐃᓐᓇᐃᑦ ᐃᓕᑕᕆᔭᐅᓚᐅᖅᑐᖅ ᐅᑯᐊᖑᓚᐅᖅᑐᑦ: ᕗᕆᐊᖕᒃ ᐊᓐᓇᓗᖅ ᐃᖃᓗᒃᑑᑦᓯᐊᕐᒥᐅᑕᖅ ᕿᑎᕐᒥᐅᓄᑦ, ᐹᕐᓇᐸᔅ ᐱᕐᔪᐊᖅ ᖃᒪᓂ’ᑐᐊᕐᒥᐅᑦ ᑭᕙᓪᓕᕐᒥ ᐊᒻᒪᓗ ᑯᐊᓃᓕᐊᔅ ᓄᑕᕋᖅ ᐊᖏᔪᖅᖠᖅ ᒥᑦᑎᒪᑕᓕᖕᒥᐅᑕᖅ ᕿᑭᖅᑖᓗᒻᒥ. 2001-ᒥ, ᑐᖏᓕᕆᓪᓗᓂᐅᒃ ᐃᓕᑕᖅᓯᓂᕐᒥᒃ ᐃᓐᓇᕐᓂ ᑐᓂᔭᐅᓚᐅᖅᑐᑦ ᐅᑯᓄᖓ ᔫᓯ ᐊᖑᑎᙳᕐᓂᖅ ᑯᒑᕐᔪᖕᒥᐅᑕᖅ ᕿᑎᕐᒥᐅᓂ, ᐃᓕᓴᐱ ᑐᓐᓄᖅ ᖃᒪᓂ’ᑐᐊᕐᒥᐅᑦ ᑭᕙᓪᓕᕐᒥ ᐊᒻᒪᓗ ᐃᓅᓯᖅ ᓇᓴᓕᒃ ᐸᖕᓂᖅᑑᕐᒥᐅᑕᖅ ᕿᑭᖅᑖᓗᒻᒥ.
|
|
ᓄᓇᐃᑦ ᐊᑎᑐᖃᖏᓐᓂᓕᕆᓂᕐᒥᒃ ᑲᑎᒪᓂᖓᑦ
ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᑦ ᓴᖅᑭᑎᑦᑎᓚᐅᕐᒪᑕ ᓄᓇᐃᑦ ᐊᑎᑐᖃᖏᓐᓂᓕᕆᓂᕐᒥᒃ ᑲᑎᒪᓂᕐᒥᒃ ᕕᕝᕗᐊᕆ 2002-ᒥ ᐃᖃᓗᓐᓂ. ᐱᔾᔪᑎᒋᔭᐅᓚᐅᖅᑐᖅ ᑲᑎᒪᑎᑦᑎᓂᕐᒥᒃ ᑲᑎᖁᓪᓗᒋᑦ ᑎᒥᐅᔪᓕᒫᓂᒃ ᐱᔪᒪᓂᖃᖅᑐᓕᒫᖑᔪᓄᑦ ᐃᓄᒃᑎᑐᑦ ᐊᑎᑐᖃᐃᑦ ᐃᓕᐅᖅᑲᖅᑕᐅᓂᖏᓐᓂᑦ ᓄᓇᙳᐊᕐᓄᑦ.
ᑲᑎᒪᓂᕐᒥᒃ ᐅᑯᓂᖓ ᐱᓕᕆᐊᖃᓚᐅᖅᑐᑦ:
1. ᑐᑭᓯᒍᑎᑦ ᖃᓄᐃᑦᑐᕕᓂᐅᓂᖓᓂᑦ ᓄᓇᓂᒃ ᐊᑎᖅᑐᐃᓂᕐᒥᒃ ᐅᑭᐅᖅᑕᖅᑐᒥ
2. ᓄᓇᐃᑦ ᐊᑎᓕᖅᑕᐅᓂᖏᑦ ᐊᑯᑭᑦᑐᓂ ᐊᒻᒪ ᑯᐸᐃ ᐅᐊᖕᓇᖓᓄᑦ
3. ᐅᖃᐅᓯᓕᕆᓂᕐᒧᑦ ᐃᓱᒫᓘᑎᑦ
4. ᐊᓯᔾᔨᖅᓯᓂᕐᒥᒃ ᐊᑎᕐᓂᑦ ᓄᓇᕘᒥ
5. ᐃᓱᒪᒋᔭᐅᒋᐊᖃᖅᑐᑦ ᓄᓇᙳᐊᓕᐅᕐᓂᐊᕐᓗᓂ
6. ᓇᐃᓈᖅᑕᐅᓯᒪᔪᑦ ᐊᑐᓕᖁᔭᐅᓯᒪᔪᑦ ᓴᖅᑭᑦᑐᓂᒃ ᑲᑎᒪᓂᕐᒥᒃ
ᐅᓂᒃᑳᓕᐊᑦ ᐊᑐᐃᓐᓇᐅᑎᑕᐅᔪᑦ ᖃᓪᓗᓈᑎᑐᑦ, ᐃᓄᒃᑎᑐᑦ, ᐅᕝᕙᓘᓐᓃᑦ ᐃᓄᐃᓐᓇᖅᑐᓐ ᐃᓕᐅᖅᑲᖅᑕᐅᔪᓐᓇᖅᑐᓂᒃ ᖃᕆᑕᐅᔭᕐᒧᑦ.
ᑐᒃᓯᕋᕈᒪᑐᐊᕈᕕᑦ ᐅᓂᒃᑳᓕᐊᖑᔪᒥᒃ ᓄᓇᐃᑦ ᐊᑎᑐᖃᖏᓐᓂᓕᕆᓂᕐᒧᑦ ᑲᑎᒪᓂᐅᓚᐅᖅᑐᒥᒃ (ᐃᓄᒃᑎᑐᑦ/ᖃᓪᓗᓈᑎᑐᑦ/ᐃᓄᐃᓐᓇᖅᑐᓐ), ᐊᑎ ᖃᕆᑕᐅᔭᒃᑯᑦ ᑐᓴᖅᑎᑕᐅᓚᑕ
|
|
ᓄᓇᐃᑦ ᐊᑎᑐᖃᖏᓐᓂᓕᕆᓂᕐᒥᒃ ᐱᔨᑦᑎᕋᕈᑎ
ᓄᓇᐃᑦ ᐊᑎᑐᖃᖏᓐᓂᓕᕆᓂᖅ ᐱᓕᕆᐊᕆᔭᐅᕗᖅ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᓐᓄᑦ ᓄᐊᑦᑎᒍᓐᓇᖁᓪᓗᒋᑦ ᐃᓄᒃᑎᑐᑦ ᓄᓇᐃᑦ ᐊᑎᑐᖃᕆᔭᖏᓐᓂᑦ, ᐊᒻᒪᓗ ᖃᕆᑕᐅᔭᒃᑯᑦ ᐃᓕᔭᐅᔪᓐᓇᖁᓪᓗᒋᑦ ᓄᓇᙳᐊᒃᑯᑦ, ᑕᒪᓐᓇ ᐱᔭᕇᖅᐸᑦ ᑐᓂᔭᐅᓪᓗᑎᒃ ᓄᓇᕗᑦ ᒐᕙᒪᖓᓄᑦ ᐊᖏᖅᑕᐅᓗᑎᒃ ᐃᓕᑕᕆᔭᐅᔪᓐᓇᖅᓯᖁᓪᓗᒋᑦ. ᑕᒪᓐᓇ ᐱᓕᕆᐊᕆᔭᐅᔪᖅ ᓯᕗᓕᐅᑎᑕᐅᖁᓪᓗᒋᑦ ᐃᓄᒃᑎᑐᑦ ᓄᓇᐃᑦ ᐊᑎᑐᖃᖏᑦ ᐃᓱᒪᒋᔭᐅᓚᐅᖅᓯᒪᙱᑦᑐᓄᑦ ᑕᐃᒪᙵᓂ ᑖᒃᑯᐊ ᖃᓪᓗᓈᑦ ᑕᒪᐅᙵᖅᐸᓪᓕᐊᓕᓚᐅᖅᑎᓪᓗᒋᒧᑦ ᖃᓪᓗᓈᑎᑐᑦ ᐊᑦᑎᖅᑐᐃᖃᑦᑕᖅᑎᓪᓗᒋᑦ ᓄᓇᓂᒃ. ᐊᒥᓲᔪᑦ ᓄᓇᓖᑦ ᓄᓇᐃᑦ ᐊᑎᑐᖃᖏᓐᓂᓕᓂᕐᒥᒃ ᐱᓕᕆᐊᖃᖅᓯᒪᔪᑦ ᐊᒥᓱᓄᑦ ᐊᕐᕌᒍᓂ ᐊᒻᒪᓗ ᐊᒥᓲᓪᓗᑎᒃ ᓄᓇᓖᑦ ᓱᓕ ᓇᓗᓇᐃᖅᓯᕙᓪᓕᐊᔪᑦ ᐊᑎᑐᖃᕐᓂᑦ. ᑖᓐᓇ ᓄᓇᐃᑦ ᐊᑎᑐᖃᖏᓐᓂᓕᕆᓂᕐᒧᑦ ᑲᑎᒪᓂᐅᓚᐅᖅᑐᖅ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᑦ ᐃᓚᐅᖏᓐᓇᖃᑦᑕᖅᓯᒪᔪᑦ ᐊᕐᕌᒍᓂ ᒪᕐᕉᓂ ᐊᓂᒍᖅᑐᓂᒃ ᐅᑯᓂᖓ ᓄᓇᓕᓐᓂ ᑕᓗᕐᔪᐊᕐᒥ (2002-ᒥ), ᒥᑦᑎᒪᑕᓕᒻᒥᒃ (2002) ᐊᒻᒪᓗ ᐸᓐᓂᖅᑑᒥ (2003-ᒥ).
|
|
ᐅᑭᐅᖅᑕᖅᑐᒥ ᐃᓄᐃᑦ ᐊᒻᒪᓗ ᐃᑦᑕᕐᓂᓴᖁᑎᖏᑦᑕ ᕿᓪᓕᖅᑐᓕᐊᖓᑦ
ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᐱᕙᓪᓕᐊᑎᑦᑎᓚᐅᕐᒪᑕ ᐅᐱᓐᓇᖅᑐᒥᒃ ᕿᓪᓕᖅᑐᒥᒃ ᐃᓗᓕᖃᖅᑐᒥᒃ ᑎᑎᕋᖅᓯᒪᔪᓂ ᐅᓂᒃᑳᓂᒃ, ᐊᔾᔨᙳᐊᕐᓂᑦ ᐊᒻᒪᓗ ᓂᐱᖅᑲᖅᑐᒥᒃ ᐅᖃᐅᓯᖃᖅᑐᒥᒃ ᐅᑭᐅᖅᑕᖅᑐᒥ ᐃᓄᖏᓐᓂ ᐊᒻᒪ ᐃᑦᑕᕐᓂᓴᖁᑎᖏᓐᓂ ᓄᓇᕗᒥ. ᓯᕕᑐᔪᒃᑯᑦ ᑐᑭᓯᒍᑎᒃᓴᖃᖅᑎᑕᐅᑦᑎᐊᖅᑐᖅ ᐃᓄᐃᑦ ᐱᐅᓯᑐᖃᕆᓚᐅᖅᑕᖏᓐᓂᑦ ᐅᓪᓗᒥᒧᑦ ᑎᑭᓪᓗᒍ. ᑖᓐᓇ ᕿᓪᓕᖅᑐᓕᐊᖅ ᐋᖅᑭᒃᑕᐅᖅᓯᒪᔪᖅ ᑐᕌᖓᑎᑕᐅᓪᓗᓂ ᐃᓕᓐᓂᐊᕐᓂᓕᓐᓄᑦ 8-ᓂᒃ ᐊᒻᒪ ᐃᓗᓕᖃᖅᑐᓂ ᑐᑭᓯᒍᑎᒃᓴᓂ ᐅᑭᐅᖅᑕᖅᑐᒥ ᐱᕈᖅᑐᖁᑎᖏᓐᓂ ᐊᒻᒪ ᓱᓇᒧᑦ ᖃᓄᕐᓗ ᐊᑐᖅᑕᐅᕙᓚᐅᕐᓂᖏᓐᓄᑦ, ᓄᓇᐃᑦ ᐊᑎᑐᖃᖏᓐᓂᒃ ᐊᒻᒪᓗ ᐱᙳᐊᖅᑕᐅᔪᓐᓇᖅᑐᒥᒃ ᖃᓄᖅ ᐊᓐᓇᐅᒪᒍᓐᓇᕐᒪᖔᑖ ᐅᑭᐅᖅᑕᖅᑐᒥ. ᑖᓐᓇ ᖃᓪᓗᓇᐅᔭᖅᑐᖅ ᐱᔭᕇᖅᓯᒪᓕᖅᑐᖅ ᑭᖑᓂᐊᒍᓪᓗ ᑖᒃᑯᐊ ᐃᓄᒃᑎᑑᖅᑐᑦ ᐃᓄᐃᓐᓇᖅᑎᑑᖅᑐᓪᓗ ᐊᑐᐃᓐᓇᕈᓛᖅᑐᑦ ᒪᓐᓇᑦᓯᐊᕈᓗ.
ᖃᕆᑕᐅᔭᒃᑯᑦ ᐳᓛᕆᐊᕈᓐᓇᖅᑐᑎᑦ ᕿᓪᓕᖅᑐᓕᐊᑉ ᐊᔾᔨᖓᓂ ᐱᔪᒪᑐᐊᕈᕕᑦ ᐅᕗᖓ ᑐᕌᕈᑎᒧᑦ:
ᖃᐅᔨᒪᒍᑦ: ᐊᑯᓂᐅᓂᐊᖅᑐᖅ ᐅᑭᐅᖅᑕᖅᑐᒥᐅᑕᐅᔪᓄᑦ ᐃᓕᐅᖅᑲᐃᓂᐊᖅᐸᑕ ᖃᕆᑕᐅᔭᒧᑦ.
|
|
ᐃᖏᕐᕋᔪᑦ ᑕᑯᔭᒐᒃᓴᐃᑦ
ᑖᒃᑯᐊ ᐃᖏᕐᕋᔭᒃᑎᑕᐅᔪᑦ ᑕᑯᔭᒐᒃᓴᐃᑦ ᒪᕐᕉᒻᒪ ᕿᔪᖁᑏᑦ ᐊᔾᔨᓕᐅᖅᑕᐅᓯᒪᔪᓂᒃ ᐱᖁᑎᑐᖃᐅᔪᓂᒃ, ᐊᔾᔨᙳᐊᑐᖃᕐᓂᑦ ᐊᒻᒪᓗ ᐅᓂᒃᑳᓂ ᐋᖅᑭᒃᓱᖅᑕᐅᓯᒪᔪᑦ ᐃᖏᕐᕋᑎᑕᐅᔪᓐᓇᖁᓪᓗᒋᑦ ᐊᑐᓂᓄᑦ ᓄᓇᕗᒥ ᓄᓇᓕᖏᓐᓄᑦ. ᑖᒃᑯᐊ ᑕᑯᔭᒐᒃᓴᐃᑦ ᐅᓂᒃᑳᕐᓂᖃᖅᑐᑦ ᐃᓕᖅᑯᓯᑐᖃᕆᔭᐅᓚᐅᖅᑐᓂᒃ ᑑᓕᓄᑦ ᓅᑉᐸᓪᓕᐊᓕᖅᑎᓪᓗᒋᑦ ᓴᐃᐱᐊᕆᒥᑦ ᐊᓛᔅᑲᒧᑦ ᐊᒻᒪ ᓄᓇᕗᒧᑦ. ᑖᒃᑯᐊ ᑕᑯᔭᒐᒃᓴᐃᑦ ᐃᓄᒃᑎᑑᖅᑐᑦ, ᐃᓄᐃᓐᓇᖅᑐᓐ, ᐊᒻᒪ ᖃᓪᓗᓈᑎᑐᑦ. ᐃᒻᒪᖄᓗ ᑖᒃᑯᐊ ᑕᑯᔭᒐᒃᓴᐃᑦ ᓄᓇᓕᓐᓂ ᑕᑯᔭᖃᑦᑕᓕᖅᐸᑕ ᓴᖅᑭᑎᑦᑎᒍᑕᐅᔪᓐᓇᖅᑐᖃᐃᑦ ᐃᓕᓐᓂᐊᕈᒪᓇᔭᖅᑐᓂᒃ ᐃᑦᑕᕐᓂᓴᓕᕆᓂᕐᒥᒃ ᐊᒻᒪᓗ ᐸᐸᑦᑐᖅᑕᐅᑦᑎᐊᖁᓪᓗᒋᑦ ᐱᒻᒪᕆᐅᑎᓪᓗᒍ ᐃᓚᒋᔭᐅᓂᖓᓄᑦ ᐱᐅᓯᑐᖃᕆᔭᑉᑎᓐᓄᑦ.
ᑖᓐᓇ ᐱᓕᕆᐊᖅ ᐱᓕᕆᐊᖑᓚᐅᖅᑐᖅ ᑲᑐᔾᔨᖃᑎᒋᔭᐅᓪᓗᑎᒃ ᑖᒃᑯᐊ ᑲᓇᑕᒥ ᑕᑯᔭᒐᖃᕐᕕᐅᔪᒥᑦ ᐃᓅᓯᕆᔭᐅᓚᐅᖅᑐᓂᑦ. ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᖃᐅᔨᒋᐊᖅᓯᒪᔪᑦ ᓄᓇᓕᓐᓂᑦ ᓇᓗᓇᐃᔭᐃᒐᓱᐊᖅᑐᑎᒃ ᓇᒥ ᑕᑯᒃᓴᐅᑎᑕᐅᔪᓐᓇᕐᓂᖏᓐᓄᑦ ᐊᒻᒪ ᖃᖓᐅᓕᖅᐸᑦ ᐊᒥᓱᓄᑦ ᑕᑯᔭᐅᔪᓐᓇᕋᔭᕐᒪᖔᑕᓗ. ᑖᒃᑯᐊ ᑕᑯᔭᒐᒃᓴᐃᑦ ᓄᓇᓕᓐᓃᑎᑕᐅᖃᑦᑕᕐᓂᐊᖅᑐᑦ ᐊᑕᐅᓯᕐᒥᒃ ᑕᖅᑭᒥ ᐊᓯᐊᓄᑦ ᓄᓇᓕᒻᒨᖅᑕᐅᓕᕐᓗᑎᒃ. ᒪᕐᕈᓄ ᐊᕐᕌᒍᓄᑦ ᐃᖏᕐᕋᑎᑕᐅᓂᐊᖅᑐᑦ ᑖᒃᑯᐊ ! ᓯᕗᓪᓕᖅᐹᒃᑯᑦ ᐃᖏᕐᕋᔭᒃᑎᑕᐅᓂᐊᖅᑐᑦ ᕿᑭᖅᑖᓗᒻᒥ, ᑭᖑᓂᐊᒍᑦ ᑭᕙᓪᓕᕐᒨᕐᓗᑎᒃ, ᐊᒻᒪ ᑭᖑᓂᐊᒍᑦ ᕿᑎᕐᒥᐅᓄᑦ.
ᓈᓚᓛᖅᑯᓯ ᓄᓇᓕᓐᓂ ᑐᓴᐅᑎᖓᑦᑎᒍᑦ ᐅᖃᐅᓯᐅᓛᕐᒪᑦ ᑎᑭᑎᑕᐅᓚᐅᖅᑎᓐᓇᒋᑦ !
|
|
ᖁᓪᓗᖅᑑᒥ ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᕐᓂᖓᑦ ᐊᒻᒪᓗ ᐃᑦᑕᕐᓂᓴᑐᖃᕐᓂᑦ ᖃᐅᔨᓴᕐᓂᖓᑦ
ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᕐᓂᕐᒥᒃ ᓴᖅᑭᑕᐅᓚᐅᖅᑐᖅ ᖁᓪᓗᖅᑑᒥ ᐋᒡᒐᓯ 2002-ᒥ ᐊᒻᒪ ᐃᑦᑕᕐᓂᓴᕐᓂᖅ ᖃᐅᔨᓴᓚᐅᖅᑐᑎᑦ ᖁᓪᓗᖅᑑᑉ ᓯᓚᑖᓂ ᐋᒡᒐᓯ 2003-ᒥ. 2002-ᒥ, ᓯᑕᒪᐅᔪᖅᑐᐃᑦ ᓄᓇᕗᒥᙶᖅᑐᑦ ᐃᓕᒋᔭᐅᓚᐅᖅᑐᖅ ᑖᑉᓱᒥᖓ ᑭᐊᓐ ᓱᕚᓯᒥ ᓴᒡᒐᖅᐸᓪᓕᐊᓂᐊᖅᑎᓪᓗᒋᑦ. ᑐᒃᓯᕋᐅᑎᑦ ᐃᓕᓐᓂᐊᖅᑎᑦ ᐃᓚᐅᔪᒪᓇᔭᖅᑐᓂᒃ ᐊᒥᓱᓂᒃ ᑐᒃᓯᕋᐅᑎᑖᓚᐅᖅᑐᒍᑦ ᐱᖓᓲᔪᓂᑦ ᐊᕕᒃᑐᖅᓯᒪᔪᓂᙶᖅᑐᖃᓚᐅᖅᑐᖅ ᓄᓇᕗᒥ (ᕿᑎᕐᒥᐅᑦ, ᑭᕙᓪᓕᕐᒥ ᐊᒻᒪ ᕿᑭᖅᑖᓗᒻᒥ).
ᑖᒃᑯᐊ ᐃᓕᓐᓂᐊᖅᑎᑦ ᐱᓕᒻᒪᒃᓴᖅᑎᑕᐅᓚᐅᖅᑐᖅ ᐃᑦᑕᕐᓂᓴᓕᕆᓂᕐᒥᒃ ᐃᑦᑕᕐᓂᓴᖃᕐᕕᐅᔪᒥ ᖁᓪᓕᖅᑑᒥ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓᑕ ᖃᓂᒋᔭᖓᓂᑦ.
ᐱᖁᑎᑐᖃᐃᑦ ᐃᓚᒋᓪᓗᒍ ᓴᕕᕋᔭᐅᔪᑦ ᓯᕗᐃᑦ ᕿᔪᒻᒥᙶᖅᑐᒥᒃ ᐊᒻᒪ ᐅᒥᒻᒪᑦ ᓇᒡᔪᖓᓂ ᓴᓇᔭᐅᓯᒪᔪᒥᒃ ᐊᓘᑎᕐᔪᐊᕐᒥᒃ ᓇᓂᓯᓚᐅᖅᑐᑦ ᓯᕗᓂᕐᒥᒃ.
ᐊᐅᔭᒥ 2003-ᒥ, ᐃᓕᓐᓂᐊᖅᑏᑦ ᐃᓚᒋᔭᖏᓪᓗ ᐃᓚᒋᔭᐅᓚᐅᖅᑐᖅ ᐃᑦᑕᕐᓂᓴᓕᕆᓂᕐᒧᑦ ᖃᐅᔨᓴᕐᓂᕐᒥᒃ ᓇᐹᖅᑐᓕᐅᑉ ᑰᖓᑕ ᓄᓇᖓᓂ ᐅᖓᓯᓗᐊᙱᑦᑐᖅ ᖁᓪᓗᖅᑑᒥ. ᐊᒥᓱᐃᑦ ᖁᓪᓕᖅᑑᒥᐅᑦ ᐃᓐᓇᖏᑦ ᐱᕈᖅᓯᒪᒻᒪᑕ ᑕᒫᓂ ᓄᓇᐅᔪᒥᒃ ᐊᒻᒪ ᑖᓐᓇ ᓄᓇ ᖃᐅᔨᒪᔭᐅᑦᑎᐊᖅᑐᓂ ᐊᒥᓱᓂᒃ ᐃᑦᑕᕐᓂᓴᖃᕐᕕᖃᕐᓂᖓᓂ. ᐊᑕᐅᓯᖅ ᑐᕌᒐᒃᓴᓕᐊᕆᔭᐅᓚᐅᖅᑐᖅ ᖃᐅᔨᓴᕐᓂᕐᒥᒃ ᐃᓕᑕᖅᓯᒐᓱᒍᒪᓪᓗᑎᒃ ᐊᒻᒪ ᓇᓗᓇᐃᔭᖅᑕᐅᑦᑎᐊᕐᓗᑎᒃ ᑖᒃᑯᐊ ᐃᑦᑕᕐᓂᓴᖃᕐᕕᕕᓃᑦ ᓴᐴᓐᓂᐊᖅᑕᐅᖁᓪᓗᒋᑦ.
ᐸᕐᓇᒃᐸᓪᓕᐊᔪᒍᑦ ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᕐᓂᒃᓴᐅᓂᐊᖅᑐᒥᒃ ᐊᔭᐅᓂᐊᖅᑐᒥᒃ 2004-ᒥ ᐊᒻᒪᓗ ᐅᖃᐅᓯᐅᓛᖅᑐᓂ ᑐᑭᓯᒍᑎᒃᓴᐃᑦ !
|
|
ᐃᓕᓐᓂᐊᓰᓐᓈᕐᓂᕐᒥᒃ ᐃᖅᑲᓇᐃᔭᓰᓐᓈᕐᓂᕐᒥᒃ ᐱᔨᑦᑎᕋᐅᑎ
ᐃᓕᓐᓂᐊᕐᓂᕐᒧᑦ ᐱᕕᒃᓴᐃᑦ ᐱᒻᒪᕆᐅᒻᒪᑕ ᐃᓄᓐᓄᑦ ᐃᓕᓐᓂᐊᕈᒪᓇᔭᖅᑐᓂᒃ ᐃᑦᑕᕐᓂᓴᓕᕆᓂᕐᒥᒃ. ᐃᓄᐃᑦ ᐃᑦᑕᕐᓂᓴᓕᕆᔨᒃᑯᖏᑦ ᐱᔫᒥᓵᑦᑎᐊᖅᐳᑦ ᑭᒃᑯᑐᐃᓐᓇᕐᒥᒃ ᐃᓕᓐᓂᐊᕐᓂᕐᒧᑦ ᐃᑦᑕᕐᓂᓴᓕᕆᓂᕐᒥᒃ ᐃᓄᐃᑦ ᐃᓚᓕᒃᑲᓐᓂᕈᓐᓇᖁᓪᓗᒋᑦ ᐃᑦᑕᕐᓂᓴᓕᕆᓂᕐᒥᒃ. ᐱᑕᖃᕐᒪᑦ ᖃᑦᓰᓐᓇᕐᓂᒃ ᐃᓕᓐᓂᐊᒐᒃᓴᓂ ᐃᓄᓐᓄᑦ ᐃᓕᓐᓂᐊᕈᒪᔪᓂᒃ ᐃᑦᑕᕐᓴᓂᓕᕆᓂᕐᒥᒃ. ᑖᓐᓇ ᐃᓕᓐᓂᐊᓰᓐᓈᕐᓂᕐᒥᒃ ᐃᖅᑲᓇᐃᔭᓰᓐᓈᕐᓂᕐᒥᒃ ᑐᕌᖅᑎᑕᐅᓯᒪᔪᖅ ᐃᓱᒪᓕᐅᕈᑕᐅᒍᓐᓇᖁᓪᓗᒍ ᐱᔪᒪᒐᔭᖅᑐᓂᒃ ᐃᓄᓐᓂᒃ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᐊᒃᓴᐅᔪᓂᒃ. ᑖᓐᓇ ᐃᓕᓐᓂᐊᕐᓂᖅ ᐃᑲᔪᕈᓐᓇᖅᑐᑦ ᑮᓇᐅᔾᔭᒃᓵᕈᑎᒃᓴᓂ ᓯᑕᒪᓄᑦ ᐃᓕᓐᓂᐊᖅᑎᒃᓴᓄᑦ. ᐃᑦᑕᕐᓂᓴᓕᕆᔩᑦ ᐊᑭᓖᑎᑕᐅᖃᑦᑕᖅᑐᑦ ᐃᓕᓐᓂᐊᖅᑎᐅᑉ ᓂᕆᔾᔪᑎᒃᓴᖏᓐᓂ ᑕᒻᒫᕐᕕᒻᒦᑎᓪᓗᒋᑦ, ᐃᓕᓐᓂᐊᖅᑎᓪᓗᒋᑦ, ᐊᒻᒪᓗ ᖃᐅᔨᓴᕆᐊᖃᖅᑐᑎᒃ ᐃᓕᓐᓂᐊᖅᑎᐅᔫᑉ ᐱᓕᕆᐊᖏᓐᓂ. ᐊᒻᒪᓗᑦᑕᐅᖅ ᐊᓯᖏᓐᓂᒃ ᐱᖁᔭᐅᓯᒪᔪᓂᒃ ᐃᓕᓐᓂᐊᕐᓂᕐᒧᑦ ᐃᓕᓐᓂᐊᕐᕕᓐᓂᑦ (ᑐᓂᔭᐅᖃᑦᑕᕐᓂᐊᖅᐸᑕ ᓈᓴᐅᑎᓂᒃ ᖁᑦᓯᓐᓂᖅᓴᐅᔪᒥᒃ ᐃᓕᓐᓂᐊᕐᕕᐅᔪᓂᑦ), ᑖᒃᑯᐊ ᐃᓕᓐᓂᐊᖅᑏᑦ ᐱᔭᕇᖅᐸᑕ ᐅᓂᒃᑳᓕᐅᕆᐊᖃᖅᑐᑎᒃ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᓄᑦ.
|
|
ᐊᑭᓐᓇᕐᒧᑦ ᓂᕕᙵᑖᑦ
ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᓴᖅᑭᑎᑦᑎᓯᒪᒻᒪᑕ ᑕᓪᓕᒪᓂᒃ ᑕᑯᒃᓴᐅᑦᑎᐊᖅᑐᓂᒃ ᑲᓚᖃᑦᑎᐊᖅᑐᓂᒃ ᓂᕕᙵᑖᓂ ᑕᑯᒃᓴᐅᑎᑦᑎᔪᓂᒃ ᐃᑦᑕᕐᓂᓴᐅᔪᓂᒃ ᐱᖁᑎᑐᖃᓂᑦ ᓄᓇᕗᒥᙶᖅᑐᓂᒃ. ᑖᒃᑯᐊ ᓂᕕᙵᑖᑦ ᑕᑯᒃᓴᐅᑎᑦᑎᔪᑦ ᐅᓗᓂ (ᐊᕐᓇᐃᑦ ᐱᓚᐅᑎᖏᑦ), ᓴᒃᑯᑐᖃᓂᒃ, ᐃᓄᒃᓱᒐᕐᓂᒡᓗ (ᐅᔭᖅᑲᓄᑦ ᐋᖅᑭᒃᓱᖅᑕᐅᓯᒪᔪᑦ), ᓴᓇᐅᒐᕐᓂᑦ ᐊᒻᒪᓗ ᑎᑎᖅᑐᒐᖅᑕᐅᓯᒪᔪᓂᒃ ᐃᓄᐃᑦ ᐱᐅᓯᑐᖃᕆᓚᐅᖅᑕᖓᓂ ᓇᓂᔭᐅᒐᔪᐃᑦᑐᓄᑦ ᐃᑦᑕᕐᓂᓴᓕᕆᔨ. ᑖᒃᑯᐊ ᓂᕕᙵᑖᑦ ᓂᐅᕕᐊᒃᓴᐅᔪᑦ.
ᐊᑏ ᑕᑯᒋᐊᕐᓗᒍ “ᓂᐅᕕᐊᒃᓴᑦ” ᖃᕆᑕᐅᔭᒃᑯᑦ ᓇᕿᔾᔪᑎᖓᓂᒃ ᓴᐅᒥᖅᐸᓰᕐᒦᑦᑐᒥᒃ ᐊᔾᔨᓕᐅᕈᒪᒍᕕᐅᒃ ᑕᑕᑎᒐᒃᓴᖅ ᐊᐅᓪᓚᖅᑎᑕᐅᔪᓐᓇᖅᑐᒥᒃ ᐅᕙᑦᑎᓐᓄᑦ.
|
|
ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᑕ ᖃᕆᑕᐅᔭᒃᑯᑦ ᐳᓛᕐᕕᖓᑦ
ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᕕᖓᑦ ᖃᕆᑕᐅᔭᒃᑯᑦ ᐳᓛᕐᕕᑖᓚᐅᕐᒪᑕ (www.ihti.ca) ᐊᒃᑑᕝᕚ 2003-ᒥ ᐊᒻᒪ ᖁᕕᐊᓱᑦᑎᐊᖅᑐᑎᒃ ᓴᖅᑭᑎᑦᑎᒍᓐᓇᕐᓂᕐᒥᒃ ᑐᑭᓯᒍᑎᒃᓴᐅᔪᓐᓇᖅᑐᓂᒃ ᐃᑦᑕᕐᓂᓴᓕᕆᔨᒃᑯᑦ ᖃᓄᐃᓕᐅᖅᐸᖕᓂᖏᓐᓄᑦ ᐊᒻᒪᓗ ᐊᓯᖏᓐᓂᒃ ᐱᓕᕆᐊᕆᕙᑦᑕᑦᑎᓐᓂᓗ.
ᐊᑏᑦ ᐱᖃᓐᓇᕆᔭᑎᑦ ᐅᓂᒃᑳᕐᕕᒋᓂᐊᖅᐸᑕ ᖃᕆᑕᐅᔭᒃᑯᑦ ᐳᓛᕐᕕᖓᑕ ᒥᒃᓵᓄᑦ ᐊᒻᒪᓗ ᐳᓛᕆᐊᖃᑦᑕᖁᓪᓗᓯ ᖃᑯᑎᒃᑯᑦ ᑐᑭᓯᒍᑎᒃᓴᐃᑦ ᓄᑖᙳᖅᑎᑕᐅᖃᑦᑕᕐᓂᖏᑦ ᐱᓕᕆᐊᑦ ᒥᒃᓵᓄᑦ ᐊᒻᒪ ᖃᓄᐃᓕᐅᖅᑕᐅᓂᐊᖅᑐᓂᒃ.
|
|
ᐊᑐᐊᒐᐃᑦ ᐱᕙᓪᓕᐊᑎᑕᐅᓂᖏᑦ
ᑕᐃᒪᓐᓇᖓᓂᑦ ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᐱᙳᖅᑎᑕᐅᓚᐅᖅᑎᓪᓗᒋᑦ, ᐊᑕᐅᓯᕐᒥᒃ ᐱᔭᒃᓴᓪᓗᐊᑕᕐᒥᒃ ᑐᓂᔭᐅᓚᐅᕐᒪᑕ ᐱᓕᕆᖃᑎᖃᕐᓂᕐᒥᒃ ᓄᓇᕗᑦ ᒐᕙᒪᖓᓂ ᐊᒻᒪ ᐃᓄᓐᓂᒃ ᓴᖅᑭᑎᑦᑎᓂᕐᒥᒃ ᐊᑐᐊᒐᒃᓴᐅᔪᓐᓇᖅᑐᓂᒃ ᒪᓕᒐᒃᓴᐅᔪᓐᓇᖅᑐᓂᒃ ᐃᑦᑕᕐᓂᓴᕐᓄᑦ, ᐱᖁᑎᑐᖃᕐᓂᑦ, ᐱᐅᓯᑐᖃᕐᓂᒡᓗ. ᒪᓐᓇᒃᑯᑦ ᐱᓕᕆᐊᖃᖅᑐᒍᑦ ᓄᓇᙳᐊᓕᕆᓂᕐᒧᑦ ᐊᑐᐊᒐᒃᓴᖓᓂ.
|
|
ᓯᕗᓂᒃᓴᒥᒃ ᐱᓕᕆᐊᒃᓴᐃᑦ
ᑭᕙᓪᓕᕐᒥ ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᕐᓂᒃᓴᒥᒃ ᓴᖅᑭᑦᑐᖃᕐᓂᐊᖅᑐᖅ (ᐊᐅᔭᒃᑯᑦ 2004-ᒥ; ᓄᓇᐃᑦ ᐊᑎᑐᖃᖏᓐᓂᓕᕆᓂᕐᒥᒃ ᑲᑎᒪᓂᒃᓴᖅ (ᐱᔭᕇᕈᑕᐅᖁᓪᓗᒋᑦ ᑕᓗᕐᔪᐊᖅ ᐊᒻᒪ ᐸᓐᓂᖅᑑᖅ ᐊᒻᒪᓗᑦᑕᐅᖅ ᓇᐅᔮᓂ ᐱᒋᐊᕐᓂᐊᖅᑐᑕ); ᓄᓇᕗᒻᒥ ᐃᑦᑕᕐᓂᓴᓕᕆᓂᕐᒧᑦ ᑕᑯᔭᒐᖃᕐᕕᒃ (ᐃᓚᒋᔭᐅᖏᓐᓇᖅᑐᒍᑦ ᑕᒪᑐᒥᖓ ᓴᖅᑭᑎᑦᑎᒍᑕᐅᓛᖅᑐᒥᒃ ᑕᑯᔭᒐᖃᕐᕕᒻᒥ); ᐱᔭᕇᖅᓯᓂᕐᒥᒃ ᐅᑭᐅᖅᑕᖅᑐᒥ ᐃᓄᐃᑦ ᐊᒻᒪ ᐃᑦᑕᕐᓂᓴᖁᑎᖏᑦᑕ ᕿᓪᓕᖅᑐᓕᐊᖓᑦ ᐃᓄᒃᑎᑑᓕᖅᑕᐅᔭᕇᖅᐸᑦ ᑐᓂᐅᖅᑲᖅᑕᐅᓂᐊᖅᑐᑦ ᓄᓇᕗᒥ ᐃᓕᓐᓂᐊᕐᕕᓕᒫᓄᑦ; ᐃᓕᓐᓂᐊᓰᓐᓈᕐᓂᐊᖅᑐᓂᒃ ᐃᖅᑲᓇᐃᔭᓰᓐᓈᕐᓂᐊᖅᑐᓂᒃ ᐱᓕᕆᐊᒃᓴᖃᖅᑎᐅᔪᓄᑦ (ᐱᓗᐊᖅᑐᒥ ᐃᑲᔪᕈᑕᐅᖁᓪᓗᒍ ᓄᓇᕗᒥᑦ ᐃᓚᐅᔪᓄᑦ ᐱᓕᕆᐊᖃᖅᑎᓪᓗᒋᑦ ᐃᑦᑕᕐᓂᓴᓕᕆᓂᕐᒧᑦ); ᐊᒻᒪᓗ ᐃᓕᓐᓂᐊᕈᑎᒃᓴᕆᔭᐅᓗᓂ ᓄᓇᕗᒥᐅᓄᑦ ᐃᓕᓐᓂᐊᖅᑐᓄᑦ ᐃᑦᑕᕐᓂᓴᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓘᓐᓃᑦ.
|
|
|
